Këshilli i Lartë i Radios dhe Televizionit të Turqisë (RTUK) gjobiti tre kanale televizive që kritikuan qeverinë për trajtimin e saj ndaj shkatërrimeve nga tërmetet që goditën vendin më 6 shkurt.
Halk TV, Tele 1 dhe Fox TV janë gjobitur dhe pezulluar për “informacionet dhe komentet që kanë transmetuar në lidhje me tërmetin”, tha Ilhan Tasci, anëtar i opozitës RTUK.
Dy kanalet e para do të paguajnë një gjobë të barabartë me 5% të xhiros për muajin janar dhe do të ndalohen për pesë ditë transmetimi i një prej emisioneve të tyre të përditshme.
Halk TV dhe Fox TV do të paguajnë gjithashtu një gjobë të barabartë me 3% të xhiros së tyre për muajin janar.
Të tre kanalet janë kritike ndaj qeverisë së presidentit, Rexhep Tajip Erdogan. Halk TV është i lidhur me partinë më të madhe opozitare, CHP.
“Edhe një herë RTUK nuk na befason me sanksionet e saj. Ata që erdhën në pushtet duke kritikuar represionin tani ndalojnë gjithçka dhe presin që ne t’u bindemi atyre (…) Halk TV do të vazhdojë të informojë dhe Turqia nuk do të mbetet pa lajme, “tweetoi Jafer Mahiroglu, kreu i Halk TV.
Qeveria turke është kritikuar ashpër nga opozita dhe media e pavarur për reagimin e ngadaltë në orët e para pas tërmetit 7.8 ballë.
Presidenti turk pranoi javën e kaluar se kishte probleme në organizimin e përpjekjeve të shpëtimit, por këmbënguli se shkalla e katastrofës ishte e madhe.
