Krista Pike, gruaja e dënuar me vdekje në Tenesi që javën e kaluar i mbijetoi dy injeksioneve vdekjeprurëse gjatë një ekzekutimi të dështuar, është zgjuar në spital dhe ka nisur të flasë, njoftoi avokati i saj Randy Spivey gjatë një seance dëgjimore. Sipas Spivey, të hënën mjekët menduan se Pike kishte pësuar vdekje të trurit dhe po përgatiteshin t’i hiqnin aparaturat e mbështetjes në jetë, por të martën ajo rifitoi vetëdijen dhe tha: “Ku jam unë?” dhe “Kush je ti?”.
Avokati tha se Pike është e zemëruar dhe e çorientuar, po përpiqet të rikthejë kujtesën dhe mbetet në spital me gjendje të rënduar. Ai raportoi se “Ka një mpiksje gjaku në njërin krah. Ka pneumoni. Nuk mund të gëlltisë ende, kështu që nuk ka ngrënë”, dhe se të dy krahët dhe këmbët e saj janë shumë të fryra, ndërsa nuk dihet sa lëvizshmëri do të rikuperojë.
Gjyqtarja Aisha Miles pranoi kërkesën e mbrojtjes për ruajtjen e të gjitha provave dhe dokumenteve që lidhen me ekzekutimin e dështuar, përfshirë materialet që ndodheshin në dhomën e ekzekutimit: tretësirën vdekjeprurëse, shiringat dhe pajisjet intravenoze. Avokatët e Pike kërkojnë që këto prova të ruhen për t’u përdorur në një padi të mundshme kundër shtetit dhe po kërkojnë më shumë transparencë mbi mënyrën se si u zhvillua ekzekutimi.
Ndërkohë, në Teksas, Jamal Howard, 46 vjeç, u ekzekutua me injeksion vdekjeprurës, pavarësisht përpjekjeve të avokatëve të tij për të ndaluar ekzekutimin. Mbrojtja e tij pati kërkuar nga guvernatori Greg Abbott një shtyrje 30-ditore duke iu referuar rastit të Pike, por kërkesa u refuzua. Ekzekutimi i Howard ishte i 30-ti i këtij viti në Shtetet e Bashkuara, të gjitha me injeksion vdekjeprurës.
Rasti i Pike ka rikthyer në qendër të debatit mënyrën se si kryhen ekzekutimet me injeksion vdekjeprurës në SHBA, veçanërisht sa i përket transparencës mbi substancat e përdorura, procedurat dhe personelin. Guvernatori i Tenesit, Bill Lee, ka bërë thirrje për një moratorium mbi ekzekutimet dhe për një hetim të pavarur, ndërsa më vonë pranoi dorëheqjen e kreut të departamentit të korrektimeve. Departamenti i Korrektimeve të Tenesit deklaroi se gjatë ekzekutimit të Pike u ndoq protokolli i miratuar, pasi shteti kishte hequr moratoriumin trevjeçar mbi ekzekutimet në maj të vitit 2025.
