Një turist francez rreth 20 vjeç u vra me thikë mëngjesin e sotëm në Ksamil. Viktima, identifikuar si Miguel Mendes, kishte ardhur në Ksamil së bashku me një grup turistësh për të festuar. Ngjarja ndodhi rreth orës 05:15 dhe, sipas të dhënave paraprake, pas një konflikti që dyshohet të ketë nisur brenda lokalit, 20-vjeçari është nxjerrë jashtë dhe është goditur me mjet prerës pranë portës së lokalit, në zonën e plazhit. Burimet raportojnë se Mendes mori disa goditje me thikë në shpinë dhe në kraharor, plagë që i shkaktuan vdekjen e menjëhershme. Trupi i tij u gjet në shezlongët e plazhit përpara lokalit.
Korrespondentja e Top Channel, Entjola Budo, njofton se i dyshuari për vrasjen është 29-vjeçari Sokrat Vata, banues në Has, i cili punonte si roje plazhi pranë një biznesi në Ksamil. Policia dyshon se konflikti ka ndodhur për motive të dobëta; një prej pistave që po hetohet lidhet me një vajzë. Sokrat Vata u arrestua pas pesë orësh arrati në Fier, ku ishte fshehur në bagazhin e një makine të drejtuar nga një vajzë, ndërsa pasagjer ishte një person tjetër; të dy rezultojnë shtetas turq.
Në të dhënat që lidhen me të kaluarën e tij penale, Vata ka rekord kriminal në Angli. Ai rezulton i dënuar për vepra që lidhen me posedimin e kokainës, armëve dhe drejtimin e automjeteve nën efektin e drogës. Më 30 prill policia në Kembrixh e pikasën duke drejtuar një makinë tip Toyota të vjedhur; Vata tentoi të largohej, por pasagjeri zbriti dhe ai vijoi arratinë në këmbë. Gjatë ndjekjes hodhi një pako kokainë në shkurre, por u kap nga policia; me vete iu gjetën edhe 560 paund dhe rezultoi pozitiv në testin për drejtim nën efektin e drogës.
Në një rast tjetër më 13 prill në Kent, Vata nuk iu bind urdhrit të policisë për të ndaluar dhe përplasi një automjet me targa të klonuara; në makinë u gjetën qese me kokainë dhe targa. Ai u arrestua dhe përfundoi para Gjykatës së Kurorës së Kembrixhit, ku pranoi akuzat për posedim të drogës së klasit A me qëllim furnizimin, drejtim të rrezikshëm, posedim kanabisi dhe drejtim nën efektet e drogës, dhe u dënua me pesë vite burg.
