Kryetarja e Autoritetit të Mediave Audiovizive, Armela Krasniqi, para Komisionit Parlamentar për të Drejtat e Njeriut dhe Mjetet e Informimit Publik prezantoi raportin vjetor të institucionit për vitin 2025. Ajo njoftoi se Bordi i AMA-s mori rreth 110 vendime gjatë vitit 2025, ndërsa në pesë vitet e fundit janë miratuar mbi 550 vendime, mbi 67% prej të cilave me dakordësi unanime. Krasniqi përmendi përbërjen numerike të vendimeve: 27 për konstatim pavlefshmërie licence/autorizimi; 48 për rinovimin e licensave; 76 për rinovimin e autorizimit; 6 për heqjen e licencave; 7 për heqjen e autorizimit; 2 për dhënien e licensave; 43 për dhënien e autorizimit; 17 akte nënligjore të ndryshme; dhe 9 vendime për çelje gare për frekuenca të lira Audio/Audiovizive.
Autoriteti monitoroi shtatë fushata zgjedhore dhe mori vendime për 38 gjoba për përmbajtje dhe 44 gjoba për pirateri televizive, me një total që llogaritet mbi 80 milionë lekë. Sa i përket sfidave gjyqësore, Krasniqi tha se gjatë vitit raportues AMA fitoi 15 procese dhe humbi vetëm një; në pesë vitet e fundit, nga 49 procese të përfunduara në shkallën e parë, 44 u fituan nga AMA, duke e çuar shifrën rreth 82% të vendimeve të konfirmuara nga gjykatat shqiptare.
Krasniqi shtroi që pavarësia e një autoriteti rregullator matet me vendimet që merr, me transparencën dhe me aftësinë për t’i mbrojtur ato përballë kontrollit institucional dhe gjyqësor, jo me deklarata politike apo perceptime. Ajo theksoi se kur AMA ka ndërhyrë kundër piraterisë, ka marrë masa për mbrojtjen e standardeve të transmetimit ose ka kërkuar respektimin e ligjit në përmbajtjen audiovizive, veprimet janë kryer mbi baza ligjore dhe profesionale.
Këshilli i Ankesave i AMA-s shqyrtoi 432 ankesa gjatë vitit 2025, 365 prej të cilave nga qytetarë të zakonshëm; mbi 84% e ankesave janë paraqitur nga vetë qytetarët. Po ashtu u shqyrtuan 329 raste programore, prej tyre në 106 u konstatuan shkelje të standardeve ligjore dhe etike dhe u morën masat përkatëse. Në total për vitin 2025 AMA mori 32 vendime me sanksione gjobë dhe 141 masa “tërheqje vëmendje”.
