Kosova rrezikon të humbë një pjesë të konsiderueshme të fondeve nga Plani i Rritjes i Bashkimit Evropian nëse mbetet pa institucione të formuara dhe funksionale. Ekspertët paralajmërojnë se pasojat e mosformimit të institucioneve janë të mëdha dhe në disa raste mund të jenë të pariparueshme.
Sipas të dhënave zyrtare, vetëm deri në fund të qershorit Kosova humbi më shumë se 50 milionë euro, pasi nuk arriti të përmbushë reformat e kërkuara nga BE-ja për gjashtëmujorin e parë të vitit. Nga 13 rekomandime të parashikuara nga mekanizmi për zhbllokimin e fondeve, u realizuan vetëm 7, ndërsa gjashtë të tjerat dështuan. Autoritetet paralajmërojnë se fatura e dytë mund të jetë trefish më e rëndë: nëse institucionet nuk krijohen deri më 31 dhjetor, vendi do të humbë rreth 166 milionë euro që janë parashikuar nga Plani i Rritjes për këtë vit.
Kuvendi i Kosovës miratoi më 13 shkurt 2026 marrëveshjet ndërkombëtare me Bashkimin Evropian të njohura si Plani i Rritjes, të cilat parashikojnë përfitime mbi 880 milionë euro për vendin. Sipas ministrit të Financave, Hekuran Murati, ky paketim financiar përbëhet një të tretën si grant dhe 629 milionë euro në formë kredie. Murati ka theksuar se këto mjete do të zhbllokohen në bazë të reformave që Kosova duhet të zbatojë.
Megjithatë, zbatimi i këtyre reformave ka ngecur për shkak të bllokadës në Kuvend, e cila po e mbajt vendin pa institucione funksionale prej muajsh. Ky bllokim ka ndikuar drejtpërdrejt në pamundësinë për të përmbushur kushtet që shoqërojnë zhbllokimin e fondeve nga Plani i Rritjes, duke prodhuar humbje financiare tashmë të materializuara dhe rrezik për të ardhmen e pagesave të parashikuara.
