Rezoluta e depozituar në Dhomën e Përfaqësuesve të Kongresit amerikan nga ligjvënësit Keith Self, Ritchie Torres dhe Mike Lawler, në mbështetje të bashkimit të Kosovës me NATO-n, ka tërhequr vëmendjen e mediave greke. Këto media vënë në pah veçanërisht se dokumenti i bën thirrje katër vendeve anëtare të NATO-s që ende nuk e njohin Kosovën të rishikojnë pozicionin e tyre: Greqia, Rumania, Sllovakia dhe Spanja.
Sipas rezolutës, njohja më e gjerë e Kosovës është e domosdoshme për të hapur rrugën e saj drejt integrimit në aleancën ushtarake. Teksti thekson se mungesa e njohjes nga një numër i vogël aleatësh të NATO-s po vazhdon të kufizojë përparimin e Kosovës, megjithëse vendi ka orientim strategjik me shtetet e NATO-s dhe ka shfaqur angazhim për stabilitet rajonal. Kongresmeni Keith Self thekson se Kosova ka treguar një “angazhim të qartë për stabilitetin rajonal dhe orientim strategjik me vendet e NATO-s,” por shprehet se përparimi i saj drejt anëtarësimit po pengohet nga mungesa e njohjes nga disa aleatë.
Në fjalën e tij, Self u shpreh: “Shtetet e Bashkuara duhet të inkurajojnë Greqinë, Rumaninë, Sllovakinë dhe Spanjën të rishikojnë pozicionet e tyre dhe të sigurojnë që Kosova të ketë një rrugë të besueshme dhe të realizueshme drejt anëtarësimit.”
Më herët, Ivana Stradner nga Fondacioni për Mbrojtjen e Demokracisë në Uashington (FDD) vlerësoi se rezoluta me mbështetje dypartiake përbën një sinjal të fuqishëm politik. Sipas saj, dokumenti përcjell mesazhin se Shtetet e Bashkuara e konsiderojnë Ballkanin një çështje strategjike të papërfunduar dhe se nuk është koha për të tërhequr apo kufizuar angazhimet ushtarake në rajon.
