Shefi i ri i arbitrave në kampionatin italian, Daniele Orsato, ka dalë në mbrojtje të arbitrit Di Bello lidhur me golin e shënuar nga Kevin De Bruyne në ndeshjen Genoa–Napoli. Sipas burimeve nga Shoqata Italiane e Arbitrave (AIA), vendimi i Di Bellos për të konsideruar të rregullt golin përputhet me instruksionet e reja të dhëna nga Orsato. Orsato, i cili ishte në tribunë në stadiumin Marassi, konfirmoi gjithashtu teksa doli nga stadiumi se kontakti mes De Bruyne dhe Vazquez nuk përbënte një gabim.
Genoa protestoi për atë që klubi e përshkroi si një goditje me parakrah në shpinë të Vazquez nga De Bruyne. Megjithatë, drejtuesit e AIA vlerësuan se shtytja nuk ishte e intensitetit të lartë dhe nuk e penalizonte situatën në mënyrë që të çonte në vendim kundër golit, pasi lojtari mbeti në këmbë. Për këtë arsye, nuk pritet që të ketë ndonjë sanksion ndaj Di Bellos. Po ashtu, arbitri i sistemit VAR, Meraviglia, nuk ndërhyri, pasi kontakti u konsiderua një episod për të cilin duhej vendosur në fushë dhe jo një gabim i qartë që kërkonte korrigjim nga VAR-i.
Orsato këtë sezon ka ndryshuar qasjen arbitrare, duke ngritur pragun për ndërhyrjet dhe duke reduktuar në minimum ndërhyrjet e VAR-it, me qëllim që arbitri në fushë të ruajë sovranitetin në marrjen e vendimeve. Kjo linjë e re ka ndikim të drejtëpërdrejtë në rastin e De Bruyne–Vazquez, ku interpretimi i kontakti si i pamjaftueshëm për të ndaluar golin hyn në këtë politikë.
Megjithatë, Genoa nuk pranon rezultatin pa reaguar dhe po përgatit një dosje për ta dërguar tek Orsato. Klubi synon të evidentojë precedentët negative të Di Bellos në ndeshjet e Genoas, duke përfshirë raste të sezonit të kaluar kundër Romës dhe Napolit, që sipas tyre tregojnë një shkallë të përsëritur vendimesh kundër klubit.
