Mungesa e një magazine doganore ka krijuar probleme në mbajtjen e mallrave të bllokuara në portin detar të Durrësit. Rreth 100 kg mallra—konkretisht atlete, pantallona dhe kufje—të bllokuara nga Dogana e Durrësit për verifikim në sheshin e konteinerëve, u vendosën në fillim të muajit në një kontenier bosh. Bllokimi u bë nga dogana në pritje të përgjigjes nga Drejtoria e Përgjithshme për vlerësimin nëse mallrat janë origjinale apo imitime.
Burime nga Dogana e Durrësit thanë për gazetaren Vali Qyrfyçi se më 9 prill u konstatua mungesa e kontenierit nga ana e doganës dhe menjëherë nisi puna për të kuptuar ku kishte përfunduar. Nga verifikimet rezultoi se agjencia e transportit detar e kishte nisur gabimisht drejt Pireut, duke e konsideruar kontenierin bosh.
Pasi mori dijeni për gabimin, kontenieri u kthye me anije dhe pritet të hapet nesër, në prani të prokurorisë së Durrësit dhe Hetimit Doganor. Sipas burimeve, malli është inventarizuar dhe me hapjen e kontenierit do të bëhet verifikimi përkatës për të përcaktuar natyrën dhe statusin e tij. Top Channel.
