Nënkryetari i Kuvendit, Agron Gjekmarkaj, shprehu shqetësim për gjendjen aktuale të Parlamentit të Shqipërisë dhe rëndësinë e fjalës së lirë si dhe hapësirave institucionale për opozitën. Gjekmarkaj theksoi se “fjala e lirë dhe hapësira institucionale e opozitës po dhunohet në mënyrë të vazhdueshme, duke rrezikuar themelet e pluralizmit dhe të sistemit demokratik”.
Ai bëri thirrje për reflektim dhe rikthim në normalitetin parlamentar, duke e përshkruar situatën si një atentat ndaj shoqërisë. Gjekmarkaj argumentoi se duke zvogëluar liritë e opozitës, po dëmtojnë edhe hapësirat politike të shumicës. Duke iu referuar figurave të njohura të politikës, ai kritikoi sjelljen e disa politikanëve socialistë, duke i cilësuar si arrogantë dhe të pasjellshëm.
Gjekmarkaj e përshkroi situatën si një tentativë për të zvogëluar mekanizmat e kontrollit mbi Qeverinë. Ai theksoi se deputetët kanë të drejtë të shprehin mendimet e tyre dhe të bëjnë pyetje në mënyra të ndryshme, duke akuzuar përpjekjet për të shkelur këtë traditë të Parlamentit. Ai shpjegoi se ky veprim është i motivuar nga frika e qeverisë për t’u përballur me pytje rreth aferave korruptive që janë në shqyrtim nga SPAK-u.
Duke iu referuar situatës politike, Gjekmarkaj kritikoi ndryshimin e pozicioneve midis Kryetarit të Kuvendit dhe Kryetarit të Grupit Socialist, duke thënë se kjo ka sjellë pasoja negative për pluralizmin. Ai paralajmëroi se nëse vazhdohet me këtë trend, do të vijnë edhe reduktime të lirisë së individëve brenda Kuvendit.
Në fund të fjalimit të tij, ai e lidhi këtë situatë me historinë e Kosovës dhe përmendi se përmendja e Sali Berishës nga serbët është një formë njohjeje për patriotizmin e tij. Gjekmarkaj përfundoi duke ironizuar se ai mund të jetë bërë objekt i ndëshkimit nga autoritetet për thashethemet dhe kritikat e tij.
