Pas rreth gjashtë orë debatesh, komisioni i ligjeve miratoi me votat e anëtarëve të Partisë Socialiste projektligjin për pagat e magjistratëve dhe e kaloi atë në Kuvend, ku për miratimin kërkohen 84 vota në seancën e së enjtes.
Maxhoranca u përball për herë të parë me përfaqësuesit e sistemit të drejtësisë, të cilët kishin vendosur vetë rritjen e pagave me afërsisht 43% përmes vendimeve të KLGJ e KLP, duke u mbështetur në një vendim të Gjykatës Kushtetuese pa pritur miratimin e Parlamentit.
Kryetari i Shoqatës së Gjyqtarëve të Shqipërisë, Engert Pëllumbi, i ftuar në dëgjesën në komisionin e ligjeve, mbajti qëndrimet e mëparshme në mbrojtje të rritjeve të vetëvendosura dhe e konsideroi si tallje zgjidhjen që propozon maxhoranca përmes projektligjit, i cili parashikon një rritje prej 2% për magjistratët. Pëllumbi deklaroi se projekti nuk respekton vendimin e Gjykatës Kushtetuese dhe cenon të drejtën e magjistratëve.
Mirela Bogdani, kreu i Këshillit të Lartë të Prokurorisë, tha se rritja e pagave shërben si një oportunitet për një sistem drejtësie të qëndrueshëm, por nuk u pajtua me formulën e projektligjit që ishte në diskutim në komisionet parlamentare.
Ilir Panda, zëvendëskryetar i Gjykatës së Lartë, vlerësoi se “formula e propozuar nuk garanton standardet detyruese të Gjykatës Kushtetuese”, duke ngulur kështu nevojën për përputhje me kriteret e vendimit kushtetues.
Gjatë seancës pati edhe përplasje verbale: Ulsi Manja u shpreh ashpër ndaj gjyqtarit Gert Hoxha, kryetar i Unionit të Gjyqtarëve, i cili sipas Manjës tentoi të impononte agjendën e tij me komente për vendimin e Gjykatës Kushtetuese. Megjithatë, Gert Hoxha la të hapur mundësinë e dialogut me qeverinë, por vendosi kushte për një ftesë serioze dhe për zhvillimin e bisedimeve “në një ambient neutral”.
