TIRANË- Kolegji Zgjedhor ka rrëzuar ankimimin e Partisë Demokratike për rezultatin e zgjedhjeve në qarkun e Beratit. Po ditën e sotme pritet të shqyrtohet edhe ankimimi për qarkun e Dibrës dhe Shkodrës.
PD kërkoi rrëzimin e tabelës përfundimtare përmbledhëse të rezultatit zgjedhor në këtë qark, duke argumentuar se procesi ka qenë i manipuluar dhe i ndikuar në mënyrë të jashtëligjshme nga pushteti.
PD ka deklaruar se procesi zgjedhor në Berat është zhvilluar në kushte të pabarabarta, të dominuara nga përdorimi i burimeve publike dhe presioni mbi votuesit, duke u kthyer, sipas saj, në një farsë që deformoi vullnetin e qytetarëve.
Më 26 qershor, Kolegji Zgjedhor do të shqyrtojë edhe ankimimin e Partisë Demokratike për rezultatin e zgjedhjeve në qarkun e Vlorës.
