Futbollisti Chinedu Ozor, 27 vjeç, ka vdekur pasi pësoi një kolaps gjatë një ndeshjeje miqësore, njofton klubi dhe mediat. Ozor po luante për Katsina United në miqësoren ndaj Niger Tornadoes, të zhvilluar të martën, më 11 gusht, në stadiumin Muhammad Dikko në Katsina, në veri të Nigerisë. Sipas një zyrtari të klubit, ai u rrëzua në fushë vetëm nëntë minuta pas nisjes së ndeshjes dhe u transportua për ndihmë mjekësore në K-Dara Specialist Hospital, ku më vonë u konfirmua vdekja e tij.
Pas lajmeve për vdekjen, disa media lokale dhe ndërkombëtare raportuan se Ozor kishte shfaqur shenja jete në morg. Raportimet thanë se një punonjës i morgut kishte vënë re lëvizje të duarve dhe kishte njoftuar kolegët, dhe se më pas Ozor ishte rikthyer në spital dhe i ishte dhënë oksigjen. Këto raportime u përhapën gjerësisht dhe krijuan spekulime rreth ngjarjes.
Katsina United ka mohuar kategorikisht se futbollisti është rikthyer në jetë. Klubi tha: “E kemi parë lajmin se Chinedu më vonë ka rifituar vetëdijen ose ‘është rikthyer në jetë’. E kuptojmë se njerëzit dëshironin me dëshpërim që kjo të ishte e vërtetë. Të gjithë e dëshironim. Por fatkeqësisht, këto raportime nuk janë të vërteta.” Me anë të njoftimit, klubi bëri thirrje që të shmangen spekulimet dhe të respektohet dhimbja e familjes dhe e shokëve të skuadrës.
Edhe guvernatori i shtetit Katsina, Malam Dikko Umaru Radda, shprehu ngushëllimet për familjen e 27-vjeçarit, duke e përshkruar humbjen si veçanërisht të dhimbshme për shkak të rinisë dhe perspektivës për karrierë premtuese. Artikulli për ngjarjen është transmetuar nga Top Channel.
