Kreu i Agjencisë Ndërkombëtare të Energjisë (IEA), Fatih Birol, paralajmëroi se Evropa mund të ketë vetëm “ndoshta gjashtë javë karburant për avionë” nëse furnizimet nga Lindja e Mesme nuk ripristohen. Ai tha se mungesa e karburantit mund të çojë në anulime fluturimesh nëse situata nuk përmirësohet. Ngushtica e Hormuzit, një rrugë kyçe për karburantin e avionëve nga Gjiri, është mbyllur nga Irani për më shumë se gjashtë javë, çka ka rritur çmimet dhe ka shkaktuar frikë për mungesa.
Evropa varet nga Lindja e Mesme për rreth 75% të importeve të karburantit për avionë. IEA njoftoi se vendet evropiane po përpiqen të zëvendësojnë furnizimet e humbura me dërgesa nga SHBA-ja dhe Nigeria, por këto dërgesa mund të mbulojnë vetëm pak më shumë se gjysmën e mungesave. Nëse Evropa nuk arrin të kompensojë më shumë se 50% të importeve të humbura, mungesa fizike mund të shfaqen në aeroporte të caktuara.
Ekspertët paralajmërojnë se edhe nëse furnizimet nga Gjiri rifillojnë, kjo mund të mos mjaftojë për të shmangur mungesat gjatë kulmit të udhëtimeve verore, veçanërisht për aeroportet më të vogla. Aeroportet kryesore, si Heathrow, mund të kenë përparësi në shpërndarje, ndërsa aeroportet më të vegjël rrezikojnë të përballen me kufizime. Industria ka paralajmëruar se nëse Ngushtica e Hormuzit mbetet e mbyllur, kontinenti mund të përballet me mungesa të karburantit për avionët, gjë që do të ndikojë në operimin e linjave ajrore dhe në kërkesën e klientëve.
Çmimi i karburantit për avionë evropian arriti një rekord prej 1,838 dollarë për ton në fillim të prillit, nga 831 dollarë para fillimit të konfliktit. Linjat ajrore kanë raportuar kosto shtesë të konsiderueshme për shkak të pasigurisë në furnizime. Komisioni Evropian po monitoron situatën dhe njoftoi se do të shpallë masat emergjente në javët e ardhshme.
