Shkrimtari kërkon reforma të thella në politikë, ekonomi, shoqëri dhe administratë, duke vlerësuar angazhimin qytetar nëpër sheshe si shans për ndryshim. Ai kritikon institucione që kanë përjashtuar qytetarin dhe propozon t’i hapin ato përherë si normë e një shoqërie të shekullit të Inteligjencës Artificiale.
Në planin politik paraqiten 20 propozime: 1) Kryeministri nuk mund të qëndrojë në detyrë më shumë se një mandat; 2) Deputetët zgjidhen drejtpërdrejt dhe nominalisht nga populli; 3) Kandidatët e partive dhe ata të paraqitur nga qytetarët kanë të njëjtat detyrime dhe të drejta në kandidim; 4) Presidenti mund të propozohet edhe nga qytetarët, por zgjidhet me tre të katërtat e deputetëve; nëse kjo nuk arrihet, vendoset me referendum mbi kandidaturat e paraqitura; 5) Nuk mund të jetë këshilltar bashkiak person me mandat në organet qendrore të një partie, që ka tashmë detyrë publike ose që nuk banon prej të paktën pesë vitesh në zonën përkatëse; 6) Të njihet e drejta e votës kudo ku qytetari ka pronë ose vendbanim; 7) Decentralizim i pushtetit bashkiak: bashkitë të mbulojnë zona urbane të veçuara dhe të krijohen komuna për grupe qendrash banimi rurale pavarësisht numrit të banorëve; 8) Këshilltarët bashkiakë zgjidhen drejtpërdrejt dhe nominalisht; 9) Asnjë person nuk mund të kryejë dy detyra funksionale jo-elektorale apo të marrë pagë të dytë për to; 10) Referendumet lokale dhe kombëtare mund të kërkohen edhe nga qytetarët pa kufizime drastike, si mjet ligjor për çështje strategjike dhe kur pushteti lokal nuk vendos dot; 11) Reforma e drejtësisë me jurinë qytetare për krimet e rënda, korrupsionin dhe banditizmin e organizuar; 12) Përcaktim i funksioneve të magjistratit që zgjidhen drejtpërdrejt nga qytetarët; 13) Me iniciativë qytetare apo të Presidentit, Kuvendi mund të shpërndahet dhe të organizohen zgjedhje të reja; e njëjta mund të bëhet për këshillat bashkiakë; 14) Vendosje e përgjegjësisë kolektive të organeve të zgjedhura, të gjykuar nga Gjykata e Lartë; 15) Të gjithë nëpunësit e administratës shpallen funksionarë publikë, të emëruar përmes konkurseve kombëtare nga juria pa konflikt interesi dhe të mos emërohen ose shkarkohen nga politikanë; 16) Nëpunësit publikë mbajnë përgjegjësi personale ligjore për çdo kundërvajtje ose mosveprim; 17) Çdo qytetar ka të drejtë të padisë shtetin për dëme nga fajet e tij; 18) Web-et e institucioneve shpallen media publike dhe rregullohen me ligj të veçantë; 19) Ndalohet përdorimi i mjeteve publike në fushata zgjedhore dhe kandidati duhet të japë dorëheqjen nga detyra ekzekutive për t’u kandiduar; 20) Fushatat zgjedhore të sigurohen si falas dhe pa shkaktuar shpenzim shoqëror për kandidatët. Top Channel.
