Në ceremoninë e diplomimit të 26 prokurorëve të rinj, prokurori i përgjithshëm Olsian Çela shprehu rezervat e tij ndaj draftit të kodit të ri penal, duke e konsideruar atë si një iniciativë të pa nevojshme dhe të pa konsultuar siç duhet. Ai theksoi se ky kod nuk është i mjaftueshëm për të përballuar sfidat e shoqërisë dhe se ka nevojë për një përmirësim të tij për të mbështetur integrimin e Shqipërisë në Bashkimin Europian.
Çela e nxori në pah situatën aktuale të sistemit të drejtësisë në Shqipëri, e cila karakterizohet nga mbingarkesa e prokurorëve. Ai paralajmëroi se aplikimi i kodit të ri penal mund të përkeqësojë situatën, pasi do të kërkonte rivlerësimin e çdo çështjeje në përputhje me rregullat e reja, e cila do të ishte komplekse dhe do të kërkonte kohë për tu njohur.
Ai gjithashtu theksoi se drafti i ri mund të krijojë konfuzion në zbatim, duke rritur mundësinë e interpretimeve të ndryshme në raste të ngjashme. Sipas tij, kjo do të çonte në një rrezik të shtuar për kriminalizimin e individëve, për shkak të zgjerimit të veprimeve të cilat do të konsideroheshin të rrezikshme dhe do të parashikonin dënime me burgim.
Çela nguli këmbë se, përpara se të kalohen ndryshime në kodin penal, duhet të vendosen qartë binarët dhe parimet që do të udhëheqin këtë proces, duke lehtësuar kështu debatin dhe zbatimin e tij në praktikë.
