Çlirim Iseni, student dhe një nga organizatorët e protestës së paralajmëruar për të drejtën e përdorimit të gjuhës shqipe në Maqedoninë e Veriut, ka reaguar pas pamjeve virale që tregojnë një paradë të një formacioni të policisë speciale në lagjet urbane të Kumanovës, dy ditë para tubimit të planifikuar për të hënën. Në pamjet shfaqen forcat speciale duke kryer stërvitje në rrugë dhe duke brohoritur: “Këtu ka vetëm Maqedoni, le ta mësojnë të gjithë”.
Në një reagim publik, Iseni ngriti dyshime nëse parada me brohoritje nacionaliste ishte rastësi apo një mesazh kërcënues ndaj studentëve dhe organizimit të protestës. Ai shkruante: “Dy ditë para protestës së studentëve shqiptarë për gjuhën shqipe, një tog i policisë speciale të RMV-së parakalon me brohoritje nacionaliste nëpër Kumanovë. Pyetja që lind është nëse kjo është një rastësi apo një paralajmërim. Përgjigjja jonë është e qartë: ne do të vazhdojmë çdo formë paqësore dhe demokratike për realizimin e së drejtës sonë legjitime – Gjuha shqipe zyrtare”.
Iseni rikujtoi historinë e lëvizjeve studentore gjatë periudhës jugosllave, duke theksuar se çdo tentativë për shtypje e bëri kauzën më të fortë, dhe nënvizoi se diversiteti kulturor ka qenë gjithmonë një vlerë e shtuar për vendin. Në reagim ai vuri edhe përgjegjësinë e shtetit mbi kërcënimin e kohezionit ndëretnik: “Kohezionin ndëretnik shpesh e kanë rrezikuar pikërisht ata që duhet ta kultivojnë – shteti. Le të kujdesemi për një shtet të ndershëm dhe demokratik për të gjithë, duke ruajtur orientimin Euro-Atlantik të vendit. Shqipja do të bëhet, se s’bën ndryshe”.
Organizatorët e protestës kanë ftuar për pjesëmarrje të gjerë dhe kanë bërë thirrje për respektim të mënyrës paqësore gjatë tubimit të caktuar për ditën e hënë. Pamjet nga Kumanova dhe reagimi i organizatorëve vijnë në prag të këtij manifestimi, ndërsa debati publik mbi përdorimin zyrtar të gjuhës shqipe në vend mbetet në fokus.
