Me 41 këshilltarë prezent në seancë, Këshilli Bashkiak i Fierit zhvilloi votimin për zgjedhjen e kreut të ri pas një mocioni shkarkimi nga grupi socialist që i pati kërkuar dorëheqjen Antoneta Çunajt. Përmes dorëheqjes së saj, znj. Çunaj shmangu procesin e votimit për shkarkim, duke i hapur rrugë procedurave për emërimin e pasardhësit në krye të këshillit.
Melsi Bogdani u propozua si kandidat nga grupi më i madh politik në Këshillin Bashkiak të Fierit për të zëvendësuar znj. Çunaj. Para votimit, ish-kryetarja nuk pranoi që të zhvillohej votim i fshehtë dhe dorëzoi dorëheqjen e parevokueshme. Në fjalën e saj, ajo vlerësoi punën trevjeçare të këshillit nën drejtimin e saj dhe theksoi se vendimet e marra gjatë kësaj periudhe kishin marrë miratimin e Prefektit të Qarkut. Sipas saj, asnjë nga këto vendimmarrje nuk ishte kthyer për parregullsi dhe nuk ishte hapur ndonjë konflikt gjyqësor lidhur me to. Ajo shprehu gjithashtu gatishmërinë për të vazhduar të kontribuojë si këshilltare, në funksion të marrjes së vendimeve që i shërbejnë komunitetit.
Pasi komisioni i mandateve u mblodh për të verifikuar kërkesën e dorëheqjes dhe kushtet procedurale të paraqitura nga këshilltarët e grupit socialist, u zhvillua votimi për kreun e ri të Këshillit Bashkiak. Melsi Bogdani u zgjodh me shumicë votash duke përdorur kartonat e votimit, dhe rezultoi me vetëm një votë kundër.
Në fjalën e tij pas zgjedhjes, kryetari i ri vlerësoi punën e ish-kryetares Antoneta Çunaj dhe deklaroi se Këshilli Bashkiak do të kalojë në një tjetër nivel nën drejtimin e tij. I gjithë procesi i verifikimit të mandatit, dorëheqjes dhe votimit u monitorua nga deputetët Ramion Kurti dhe Erio Mile.
