Kryeministri Edi Rama ka reaguar menjëherë pas leximin të pesë kërkesave të protestuesve nga aktivisti Dritan Goxhaj në tubimin e sotëm. Përmes një videoje ku shfaqen postime të Goxhajt me pikëpamje pro Iranit, Rama shkruan: “Si thoshin derrat e knaqun migjenianë të segmentit ‘intelektual’ të protestës, nuk ka lidhje Irani ëëë….?¿” dhe shton: “Mos harroni çfarë ju kam thënë qysh në fillim: Dy fitimtarë do dalin kur kësaj proteste t’i bien të tëra puplat fallco të flamingove, Partia Socialiste që do të bëhet më e fortë dhe qeverisja jonë që do të përmirësohet shumë ndjeshëm”. Në fund të reagimit të tij, Rama thotë se Goxhaj “nuk është gjë tjetër veçse një zëdhënës i interesave të Iranit.”
Kërkesat e lexuara nga Goxhaj në emër të Grupit Koordinues të Protestës, pas 22 ditësh dëgjimi të propozimeve të sovranit, përfshijnë vijimësisht:
1) Dorëheqjen e panegociueshme të Kryeministrit dhe të qeverisë.
2) Krijimin e një qeverie teknike tranzitore, jopartiake, me mandat 12-mujor.
3) Ndryshime Kushtetuese për barazinë e të gjithë shtetasve para ligjit dhe miratimin e tyre me referendum popullor, duke përfshirë ndër të tjera:
– Ndryshimin e Kodit Zgjedhor;
– Ndryshimin e ligjit për financimin e partive politike dhe organizatave të ndryshme;
– Kufizimin e ushtrimit të detyrës së Kryeministrit në jo më shumë se dy mandate, të plota ose të pjesshme, gjatë gjithë jetës politike të një individi.
4) Në mënyrë paralele, anulimin e disa ndryshimeve ligjore dhe paketave:
– Anulimin e ndryshimeve në ligjin për “Zonat e Mbrojtura”;
– Anulimin e ndryshimeve në ligjin për “Trashëgiminë kulturore”;
– Shfuqizimin e “Paketës së Maleve”;
– Shfuqizimin e statusit dhe kuadrit ligjor për “Investimet Strategjike”.
5) Hartimin e një kontrate të re sociale mes qytetarëve dhe shtetit pas konsultimit me intelektualë, ekspertë teknikë dhe qytetarë apartiakë të propozuar nga sheshi i protestës.
Deklarata përfundon se këto janë kërkesa të qarta, legjitime dhe të panegociueshme, të dala nga zëri i qytetarëve dhe se grupi mbetet i vendosur në rrugën e protestës paqësore, demokratike dhe qytetare deri në realizimin e tyre. Top Channel.
