Bayerni i Mynihut arriti një fitore të dukshme ndaj Atalantës në New Balance Stadium, duke e mundur 6-1, dhe tashmë shikon me optimizëm çerekfinalet e Ligës së Kampioneve. Performanca e skuadrës bavareze jo vetëm që dhuroi spektakël në Bergamo, por gjithashtu dërgoi një mesazh të qartë për klubet e tjera evropiane që janë të angazhuara në këtë edicion të konkurrencës.
Megjithatë, ky triumf nuk erdhi pa përpasoja për Bayernin. Skuadra pësoi tre dëmtime të mundshme, me shqetësimin më të madh që lidhet me Alphonso Davies. Mbrojtësi kanadez, i cili po rikthehej pas një dëmtimi muskular, u detyrua të lëshonte fushën mes lotësh pas shfaqjes së problemeve të reja fizike. Kujtojmë se Davies kishte qenë jashtë për një periudhë të gjatë për shkak të një dëmtimi të ligamentit të kryqëzuar.
Po ashtu, Jamal Musiala dhe Jonas Urbig nuk arritën ta përfundonin ndeshjen. Musiala doli nga fusha duke çaluar në fund të takimit, ndërsa Urbig u transportua në spital për shkak të një përplasjeje, me dyshimin për tronditje cerebrale, pas golit të nderit të shënuar nga Pasalic për Atalantën. Dëmtimi i Manuel Neuer gjithashtu e lë Bayernin pa një nga portierët e saj kryesorë për disa javë.
Drejtori sportiv i Bayernit, Max Eberl, përpiqet të minimizojë panikun, por ka shprehur shqetësim për situatën. Ai tha se po pret rezultatet e ekzaminimeve mjekësore. Eberl theksoi se rasti i Musiala ishte më pak i rëndë, ndërsa dëmtimi i Davies përbënte një shqetësim më të madh. Ai gjithashtu konfirmoi se Urbig kishte simptoma të tronditjes dhe dhimbje koke.
Në qendër të situatës, një lajm më i mirë për Bayernin ishte fakti që Harry Kane qëndroi në stol për të gjithë ndeshjen dhe nuk u sforcua pas problemeve të mëparshme fizike.
