Bankers Petrolium nëpërmjet një komunikimi për shtyp deklarin se po ndjek me shqetësim hetimet ndaj disa prej drejtuesve e punonjësve të vet aktualë dhe të mëparshëm. Gjithashtu kërcënohet se e gjithë kjo situatë do të çohet në Arbitrazh ndërkombëtarë!
“Përsërisim se ndryshimi i kontrollit tek investitorët aktuale ndodhi në shtator 2016”, thuhet në njoftim, duke mos marrë për bazë shtrirjen e hetimeve që në 2015.
Por kompania shkruan në njoftim se zhvillimet vijnë “pas disa muajsh mbikqyrjeje mbi komunikimet telefonike dhe sekuestrimit të sendeve personale dhe të punës të disa prej punonjësve, të kryera në rrethana që ngrenë shqetësime serioze mbi procedurat dhe porporcionalitetin, duke kulmuar në masa kufizuese ndaj individëve dhe mjeteve të punës”.
“Rikonfirmojmë se marrëveshjet sipas të cilave Kompania operon në Shqipëri dhe sistemi i “rikuperimit të kostove” në ato marrëveshje, i cili është në qendër të këtij hetimi penal ndaj drejtuesve dhe punonjësve të Kompanisë, u vlerësuan në një vendim përfundimtar të lëshuar nga një arbitrazh i ICC në vitin 2024” shkruajnë zyrtarët e kompanisë që konfirmojnë se po punojnë plotësisht me autoritetet hetimore shqiptare.
“Punonjësit kanë të drejtë të prezumohen të pafajshëm dhe kanë të drejtën për mbrojtje ligjore të pavarur dhe të drejtë. Kompania do të ofrojë mbrojtje ligjore për gjithë stafin e prekur dhe garanton përfaqësim ligjor në cdo fazë proceduriale”, duke deklaruar ndër të tjera se ka angazhuar ekipe ligjore në Shqipëri dhe jashtëvendit për të përgatitur mbrojtjen përpara organeve ndërkombëtare të arbitrazhit.
“Kompania aktualisht po vlerëson të gjitha rrugët ligjore ndërkombëtare të disponueshme, duke përfshirë procedimet tek institucionet ndërkombëtare të investimeve dhe arbitrazhit sipas Rregullave të ICC-së, me qëllim mbrojtjen e të drejtave të saj si investitor i huaj dhe ruajtjen e sigurisë ligjore të operacioneve të saj. Kompania do të vazhdojë të përmbushë detyrimet e saj kontraktuale dhe t’u përmbahet ligjeve shqiptare. Ne besojmë se as mekanizmat e lartpërmendur dhe as nxitja e tyre nuk duhet të zëvendësojnë dialogun në lidhje me zbatimin e vendimit përfundimtar të lëshuar në arbitrazhin e lartpërmendur të ICC-së, të cilin ne kemi shprehur prej kohësh gadishmërinë tonë për ta finalizuar dhe zbatuar.
Kompania jonë nuk do të pranojë asnjë ndërhyrje të pajustifikuar që dëmton stafin e saj, familjet e tyre, reputacionin e saj ose investimin e saj të gjatë në vend”, thuhet në njoftimin e Bankers.
