Një nga gjyqtaret që nuk aprovoi dërgimin e grupit të parë të emigrantëve nga Italia drejt Shqipërisë ka raportuar në Prokurorinë e Shtetit në Romë se ka marrë kërcënime me vdekje.
Silvia Albano është një nga gjashtë gjyqtarët në njësinë e imigracionit të gjykatës së Romës që hodhi poshtë ndalimin e 12 emigrantëve duke deklaruar se vendet e tyre të origjinës, Bangladeshi dhe Egjipti, nuk mund të konsideroheshin të sigurta bazuar në një vendim të 4 tetorit të Gjykatës Evropiane të Drejtësisë.
Albano është presidente e fraksionit të majtë të gjyqësorit Magistratura Democratica (Magjistratura Demokratike, MD).
“Fushata e shpërfilljes që u nis kundër magjistratëve në Romë dhe në veçanti kundër Silvia Albano-s ka kontribuar në ndërtimin e një klime kontrasti, urrejtjeje që më në fund çoi në kërcënime të rënda për sigurinë dhe jetën e saj”, theksoi MD në një shënim të lëshuar të enjten.
MD përmendi gjithashtu në deklaratë faktin se tre prokurorëve në Palermo të cilët morën kërcënime pasi kërkuan një dënim me gjashtë vjet burg për zëvendëskryeministrin dhe ministrin e Transportit Matteo Salvini për akuzat e rrëmbimit për anijen e emigrantëve, janë vënë nën mbrojtje të veçantë.
Vendimi i gjykatës së Romës të premten, i cili çoi në kthimin e emigrantëve në Itali nga qendra e sapohapur në Shqipëri, u kritikua nga anëtarët e qeverisë, përfshirë ministrin e Drejtësisë Carlo Nordio, i cili e përshkroi atë si “jonormal”.
Pas vendimit, qeveria italiane miratoi të hënën një dekret të ri që rendit 19 vende, përfshirë Egjiptin dhe Bangladeshin, si të sigurta, duke thënë se gjykatat nuk mund të vendosin kundër saj në bazë të Gjykatës Evropiane të Drejtësisë të 4 tetorit, mbi të cilën u bazua vendimi i së premtes.
