Në emisionin “Galeri” këtë të diel, me drejtues Ed Manushin, i ftuar ishte këngëtari Gjergj Jorgaqi, i cili rrëfeu hapat e karrierës së tij dhe kulmin që pati në muzikë. Ai foli për vendimin e tij për t’u shkëputur nga grupet dhe për të dalë si solist, duke theksuar se shumë gjëra i bënte vetë dhe për këtë u largua nga formacionet kolektive.
Jorgaqi ndaloi te një kujtim të veçantë nga viti 1995, gjatë një koncerti të organizuar nga “Vizion 2000” në Tropojë, në Pallatin e Kulturës. Në atë mbrëmje ishin rreth 15 këngëtarë, dhe ai ishte i treti nga fundi. Fillimisht këndoi baladën “Ti qave”, por publiku nuk e njihte ende me emër; e prezantuan si Gjergj Jorgaqi dhe salla mbeti e heshtur, pavarësisht se e plotë.
Në momentin që nisi të interpretonte këngën “Në këtë natë”, situata ndryshoi rrënjësisht: sipas tij, xhamat u prishën, dera u hap dhe njerëzit hyjnë në sallë, duke krijuar një rrëmujë të madhe përpara skenës. Ai tregoi se u përball me një reagim kaq të fuqishëm nga publiku, saqë rrezikonte të “shqyhej” nga turma. Suksesi ishte i tillë që nuk mundi të largohej nga skena për të paktën gjysmë ore, ndërsa njerëzit kërkonin që t’ia këndonte sërish këngën. Jorgaqi tha se nuk e kishte menduar kurrë një reagim të tillë dhe se përjetimi ishte shumë i fortë.
Gjatë bisedës, këngëtari rikujtoi se ndryshimi nga performancat me grupe drejt karrierës solo pati një ndikim të qartë në mënyrën si e perceptoi publiku, dhe se ajo natë në Tropojë shënoi një nga momentet më të spikatura të pranimit të tij si artist individual.
