Kenan Yildiz, i vlerësuar nga Juventusi me të paktën 100 milionë euro, vazhdon të jetë objekt interesi i klubeve më të mëdha evropiane, me Realin e Madridit në krye, për merkaton e verës së vitit 2027. Futbollisti turk, 21 vjeç, u vu në shënjestrën e Los Blancos që në vitin 2025, gjatë kohës kur në pankinë ishte Xabi Alonso, dhe interesi i klubit madrilen nuk u zbeh edhe pas rinovimit të kontratës së Vinicius.
Paraqitjet e Yildiz kanë mbajtur të gjallë vëmendjen e Realit, i cili kërkon të afrojë një tjetër element sulmues në skuadër. Përballë interesit europian, Juventus ka ruajtur qasjen e tij ndaj lojtarit duke e blinduar me një rinovim kontrate dhe me një pagë vjetore prej 7 milionë eurosh, duke e shndërruar Yildizin në simbol të projektit të ri të klubit bardhezi. Pas rinovimit, klubi zyrtarizoi se e ka konsideruar të pashitshëm në merkaton e verës, që tregon dëshirën për ta mbajtur atë si pjesë kyçe të ekipit.
Megjithatë, drejtuesit e Juventusit kanë marrë masa dhe në planin sportiv për të siguruar zëvendësime në rast nevoje. Klubi arriti të sjellë në skuadër Kerim Alajbegovic, si një lëvizje që synon të mbulojë pozicionin e Yildiz nëse për turkun do të vijë një ofertë të parezistueshme gjatë verës së 2027-ës. Shtimi i Alajbegovic shihet gjithashtu si masë paraprake në rast se Juventusi nuk do të arrijë të kualifikohet në Ligën e Kampioneve sezonin e ardhshëm dhe do t’i duhet të kryejë një shitje të rëndësishme për të riorganizuar buxhetin.
Në këtë situatë, statusi i Yildiz mbetet i qartë nga ana e Juventusit: si një ndërtues i projektit të ri me kontratë të rinovuar dhe pagë të lartë, por edhe si një aset i monitoruar nga klube të mëdha evropiane që mund të tentojnë një transferim të shumëmilionësh në verën e 2027-ës.
