Presidenti amerikan Donald Trump ka pezulluar për tri ditë vendosjen e tarifave të reja prej 50% ndaj një game të gjerë mallrash kanadeze, ndërsa SHBA dhe Kanadaja po përpiqen të finalizojnë një marrëveshje tregtare. Vendimi u njoftua më pak se dy orë para se tarifat të hynin në fuqi dhe të prekeshin rreth 20 miliardë dollarë importe kanadeze. Në një postim në rrjetet sociale, Trump tha se tarifat janë pezulluar “për një periudhë tre ditore” pasi Kanadaja dhe SHBA-ja kanë një marrëveshje në pritje të finalizimit të dokumenteve.
Negociatat kanë qenë intensive: Trump dhe kryeministri kanadez Mark Carney zhvilluan dy biseda gjatë javës, ndërsa negociatorët janë në bisedime që nga korriku. Carney konfirmoi përparim të konsiderueshëm, por theksoi se ende mbetet punë për t’u përfunduar. Tarifat e kërcënuara do të prekeshin produkte si vera, produktet e bulmetit, çimento, veshjet dhe pajisjet e hokejit, dhe do t’u shtoheshin tarifave ekzistuese ndaj çelikut, aluminit, automjeteve dhe lëndës drusore kanadeze.
Sipas zyrës së Përfaqësuesit Tregtar të SHBA-së, marrëveshja e mundshme do të përfshijë akses më të gjerë të produkteve amerikane në tregun kanadez, angazhime për sigurinë ekonomike dhe përafrim në tregtinë digjitale. Uashingtoni kërkon gjithashtu që Kanadaja të heqë tarifat hakmarrëse ndaj automjeteve amerikane dhe të ndryshojë kuotat për produktet e bulmetit, për të zgjatur aksesin për prodhuesit amerikanë. Një tjetër çështje në bisedime është rikthimi i shitjes së alkoolit amerikan në disa provincia, masë kjo që u vendos vitin e kaluar si kundërpërgjigje ndaj tarifave të Trumpit.
Trump tha se një marrëveshje përfundimtare mund të hapë rrugën për ringjalljen e projektit të gazsjellësit/naftësjellësit Keystone XL, i bllokuar më parë nga administratat e të dy presidentëve paraardhës; projekti është kundërshtuar nga ambientalistët dhe grupet indigjene. Sipas Reuters, palët po diskutonin uljen e tarifave amerikane ndaj automjeteve nga 25% në 15%, por nuk kishin rënë dakord për kriteret e përfitimit, me SHBA-në që kërkon zbatimin vetëm për automjetet me përqindje të lartë komponentësh të prodhuar në Amerikë. Dhoma Amerikane e Tregtisë bëri thirrje për arritjen e një marrëveshjeje, duke paralajmëruar dëme ekonomike dhe rritje të kostove në mungesë të saj. Shtyrja treditore i jep negociatorëve një afat shtesë për finalizim.
