Policia greke arrestoi dy shqiptarë në Athinë, të kapur me sasi të konsiderueshme marijuane dhe kokainë. Njëri prej tyre rezulton me precedentë të shumtë penalë, përfshirë edhe vrasje. Në total, ndaj tre personave — dy shqiptarëve, 44 dhe 23 vjeç, dhe një shtetasi grek 29-vjeçar — është ngritur çështje penale për blerje, posedim dhe trafikim të drogës, si dhe për dhunë ndaj punonjësve të policisë.
Për të ndërprerë veprimtarinë e tyre policia përdori inteligjencë, veprime policore dhe verifikime të kryqëzuara të të dhënave dhe profilizim. Në një zonë të Athinës Verilindore, 44-vjeçarit iu gjetën 3 kilogramë e 215 gramë kokainë me qëllim trafikimin. Në një zonë tjetër të Athinës Perëndimore, me ndihmën e oficerëve të skuadrës “DIAS”, u lokalizua 29-vjeçari grek; në bagazhin e makinës së tij u gjetën 10 kilogramë e 800 gramë marijuanë dhe 3 kilogramë e 900 gramë hashash në formë çokollate.
Hetimet zbuluan se këto sasi u ishin furnizuar më parë dy personave të arrestuar nga 23-vjeçari shqiptar, i cili vepronte edhe në emër të një personi tjetër. Pas kontrollit në shtëpinë e 23-vjeçarit në Artemida, banesë e marrë me qira nga një person i paidentifikuar për datat 6–13 tetor, u gjetën dhe u sekuestruan sasi të mëdha droge: 32 kilogramë e 65 gramë kokainë, 245 kilogramë e 700 gramë marijuanë dhe 51 kilogramë e 600 gramë hashash në formë çokollate.
Kontrollet në banesat e dy të arrestuarve të tjerë, me ndihmën e oficerëve të Nëndrejtorisë së Inteligjencës dhe Veprimeve Speciale, nxorrën sasi shtesë lëndësh narkotike. Në total, si pjesë e operacionit u sekuestruan: 35 kilogramë e 400 gramë kokainë, 256 kilogramë e 503.3 gramë marijuanë, 55 kilogramë e 500.9 gramë hashash në formë çokollate, si dhe 170 euro, një makinë, 7 telefona celularë, 3 karta memorieje, doreza, shumë paketime najloni dhe 4 çelësa.
Oficerëve të Prokurorisë u bë përshtypje se paketimet e “çokollatës” kishin fotografi të Presidentit të SHBA-së Donald Trump, Presidentit rus Vladimir Putin, Kryeministrit izraelit Benjamin Netanyahu, “mbretit të kokainës” Pablo Escobar dhe një kompanie të njohur këpucësh. (Top Channel)
