Kancelari i Gjermanisë, Olaf Scholz, ka shkarkuar ministrin e financave, Christian Lindner, të mërkurën, pas një dështimi të bisedimeve mes qeverisë së koalicionit, e cila përbëhej nga socialdemokratët e Scholz (SPD), të Gjelbërit dhe partia liberale e Lindner, FDP.
Sipas mediave të huaja, përcjell Telegrafi, kancelari Scholz mbajti një konferencë shtypi duke shpjeguar vendimin e tij për të shkarkuar ministrin e tij të financave, gjë që e ka vënë koalicionin e tij në rrezik.
Scholz gjithashtu përdori fjalimin për të diskutuar se si Gjermania duhet të ecë përpara pas zgjedhjeve në SHBA.
“Ministri i Financave Lindner nuk tregoi gatishmëri për të zbatuar asnjë nga propozimet tona”, citohet të ketë thënë Scholz, duke shtuar se kompanitë gjermane kanë nevojë për mbështetje të menjëhershme dhe “kushdo që e refuzon këtë po vepron në mënyrë të papërgjegjshme”.
Kancelari Olaf Scholz ka shtuar se do të ketë një votëbesim për qeverinë e tij në mes të janarit.
Ky veprim mund të afrojë zgjedhjet parlamentare të Gjermanisë, të planifikuara për vjeshtën e vitit 2025, për në mars të 2025.
Siç vënë në pah mediat, kjo lëvizje e kancelarit sinjalizon ndarje të thella mes partive të koalicionit qeverisës në Gjermani, të përbërë nga SPD-ja, Të Gjelbrit dhe FDP-ja.
Christian Lindner, i cili ka kërkuar prej kohësh reforma të thella në ekonomi dhe në politikat fiskale të Gjermanisë, propozon zgjedhje të reja për Bundestagun, duke sugjeruar që koalicioni aktual nuk mund të sigurojë stabilitetin e nevojshëm për vendin.
Ai gjithashtu ka kërkuar që të gjitha partitë të dakordohen për një proces të qetë zgjedhor në fillim të vitit 2025.
