Një shtetas shqiptar, Ëngjëll Brahimi, 62 vjeç, i dënuar në Shqipëri për vrasjen e një polici dhe të një fëmije 8-vjeçar, nuk do të ekstradohet nga Kanada. Ky vendim u konfirmua nga Gjykata e Apelit në Quebec, e cila deklaroi se provat për ekstradim ishin të pamjaftueshme.
Ngjarja tragjike ndodhi 25 vite më parë, kur Brahimi, i motivuar nga hakmarrja për vdekjen e vëllait të tij, sulmoi shefin e hetimeve të një rrethi në momentin kur ky ishte me familjen. Ai e goditi me armë automatike, duke shkaktuar vdekjen e fëmijës dhe duke lënë policin të arratisej, përpara se njëri nga autorët ta ekzekutonte.
Gruaja e viktimës e identifikoi Brahimin disa muaj pas ngjarjes, por ai kishte ikur nga Shqipëria. Fillimisht u nis për në Greqi dhe më pas në Kanada, ku fitoi shtetësinë.
Gjykata në Shqipëri kishte ndjekur një proces që, sipas avokatëve të Brahimit, nuk ishte i besueshëm. Gjyqtari kanadez, Alexandre Boucher, theksoi se provat ishin të paqëndrueshme dhe se identifikimi i Brahimit nga gruaja e viktimës kishte pasur gabime. Një apel i prokurorit të përgjithshëm të Kanadasë, në emër të Shqipërisë, për të rishikuar vendimin, u hodh poshtë nga Gjykata e Apelit, e cila konfirmoi se nuk kishte pasur gabime në vendimin e shkallës së parë.
Pavarësisht se arratisja e Brahimit mund të interpretohet si shenjë e fajësisë, ajo po ashtu mund të jetë një përpjekje për të shmangur një akuzë të gabuar. Gjykata arriti në përfundimin se ekzistonte një rrezik real që provat të ishin thelbësisht të pasakta, dhe për këtë arsye, vendimi për të mos ekstraduar Brahimin u mbështet nga elemente të shumta juridike.
