Juventus nuk arriti të shfrytëzojë barazimin e Comos dhe humbjen e Milanit për t’u afruar më shumë kualifikimit në Ligën e Kampioneve të sezonit të ardhshëm. Në Allianz Stadium, “Zonja e Vjetër” u ndal në një barazim 1-1 me Veronën, që është rënë tashmë nga kategoria, rezultat që nuk i sjell përfitime të mëdha skuadrës bardhezi.
Verona surprizoi në pjesën e parë, duke përfunduar atë me avantazhin 1-0. Boëie shfrytëzoi një gafë në mbrojtjen e Juventusit në minutën e 34 për të dërguar topin në rrjetë, ndërsa tifozët e pranishëm në stadium i fërshëllyen lojtarët e ekipit të drejtuar nga Luciano Spalletti. Në pjesën e dytë Spalletti hodhi në fushë Dusan Vlahovic në vend të Khephren Thuram, por skuadra vijoi të kishte vështirësi në zhvillimin e lojës.
Në minutën e 62 Juventus arriti të rikthejë baraspeshën nëpërmjet një goli të Dusan Vlahovic, i cili ekzekutoi saktë një goditje dënimi nga rreth 25 metra, duke e bërë rezultatin 1-1. Ky gol i dha një shtysë Juventusit dhe me kalimin e minutave loja u zhvendos më shumë në gjysmëfushën e Veronës, por përpjekjet nuk sollën ndryshim të mëtejshëm të shifrave. Ndeshja përfundoi 1-1 dhe ekipet ndanë nga një pikë secila.
Me këtë rezultat Juventus humbi mundësinë për t’u shkëputur më tej nga Como, që qëndron në vendin e katërt, dhe për të forcuar pozicionin në luftën për vendet që çojnë në kompeticionet evropiane. Verdheblutë e Veronës, edhe pse tashmë të sigurta për rënien nga kategoria, arritën të marrë një pikë të vlefshme kundër një kundërshtari të fortë në transfertë.
