Japonia planifikon të investojë fuqishëm në dronë sulmues, inteligjencë artificiale dhe raketa me rreze të gjatë si pjesë të përshtatjes së ushtrisë me format e reja të luftës. Ministria japoneze e Mbrojtjes ka kërkuar një buxhet paraprak prej 8.9 trilionë jenësh (rreth 55.6 miliardë dollarë) për vitin fiskal që nis në prill 2027; shuma përfundimtare pritet të rritet pasi qeveria e kryeministres Sanae Takaichi të miratojë strategjinë e re të sigurisë.
Tokio synon prodhimin vendas dhe në masë të mjeteve pa pilot me kosto të ulët. Dronët sulmues pritet të përdoren së bashku me raketat me rreze të gjatë për të kryer kundërgoditje më të shpejta dhe me më pak rrezik për personelin ushtarak. Projektet përfshijnë blerjen e dronëve që mund të lëshohen nga ajri ose nën ujë, si dhe zhvillimin e mjeteve pa pilot që zëvendësojnë në pjesë nevojën për forca të mëdha njerëzore, në një kohë kur popullsia japoneze plaket dhe tkurret. Megjithatë, Ministria e Mbrojtjes pranon se arritja e një industrie të dronëve plotësisht vendase është sfidë, pasi tregu i brendshëm dominohet nga importet kineze.
Përveç dronëve, plani përfshin zhvillimin e raketave hipersonike që mund të lëshohen nga nëndetëset dhe forcimin e mbrojtjes ajrore me raketa kapëse. Këto aftësi synohen për të përmirësuar kapacitetet e kundërveprimit dhe mbrojtjes në terren dhe në ajër.
Inteligjenca artificiale do të integrohet në sistemet e komandimit për analizimin e fushëbetejës, përzgjedhjen e objektivave dhe për përshpejtimin e vendimmarrjes operative. Si pjesë e këtij rregjimi teknologjik, Japonia planifikon të krijojë një platformë të quajtur “AI Orchestrator”, e cila do të jetë e aftë të bashkërendojë disa sisteme të inteligjencës artificiale. Të gjitha këto masa i përgjigjen nevojës për të modernizuar forcat dhe për t’u përshtatur me format e reja të konflikteve.
