HIMARË– Bruno Çela, 31-vjeç, djali i pronarit të Brunes Geront Çela, rezulton të jetë pronari i jahtit, ku mbrëmjen e djeshme në zonën e Palasës, dyshohet se u qëllua me armë zjarri. Mësohet se Çela është marrë në pyetje nga Policia, ndërkohë që pas kontrolleve në jaht sipas policisë nuk janë gjetur sende të paligjshme. Personat e tjerë që janë gjetur në jaht dhe janë shoqëruar, janë Afrim Kastrati, Leandro Haso dhe Pashk Gjini.
Bruno Çela është i martuar me vajzën e ish-deputetit Tom Doshi, dhe njihen për influencën e tyre në botën e biznesit. Burime pranë grupit hetimor bëjnë me dije se po verifikohen rrethanat e ngjarjes dhe roli i secilit prej personave që ndodheshin në mjetin lundrues në momentin e të shtënave.
Jahti tentoi t’i fshihej policisë pas ngjarjes, por u ndalua nga policia dy orë më vonë, ndërsa nuk u gjet asgjë e paligjshme pas kontrolleve.
