Izraeli po ushtron presion ndaj Shteteve të Bashkuara për të penguar zhbllokimin e aseteve iraniane si pjesë të një marrëveshjeje të mundshme armëpushimi mes Uashingtonit dhe Teheranit, raporton CNN. Sipas të njëjtit burim, qeveria izraelite ka shprehur shqetësim që çlirimi i fondeve iraniane mund të bëhet pjesë e kompensimeve në negociatat midis dy vendeve.
Kryeministri Benjamin Netanyahu ka zhvilluar kontakte të vazhdueshme me Presidentin amerikan Donald Trump lidhur me këtë çështje, përfshirë një bisedë të enjten në mbrëmje, shkruan CNN. Kontaktet erdhën pas deklaratave të Trump se disa vende të Lindjes së Mesme kishin shprehur mbështetje për marrëveshjen në diskutim, diçka që sipas burimeve izraelite ka nxitur reagimin e Tel Avivit.
Netanyahu më vonë deklaroi se gjatë bisedave Trump ishte angazhuar për disa pika kyçe: largimin e uraniumit të pasuruar nga Irani, çmontimin e programit bërthamor iranian, kufizimin e kapaciteteve raketore dhe ndërprerjen e mbështetjes për grupet aleate të Teheranit në rajon. Kryeministri përsëriti qëndrimin e tij të prerë lidhur me këto çështje, duke theksuar: “Për sa kohë që unë jam kryeministër i Izraelit, Irani nuk do të ketë armë bërthamore.”
Gazetaria raportoi se, ndërsa Trump ka folur publikisht kryesisht për çështjen e uraniumit të pasuruar, ai nuk ka përmendur për javë të tëra kufizimet ndaj programit raketor apo ndalimin e mbështetjes për grupet që mbështeten nga Irani. Sipas CNN, njoftimi i Trump për një marrëveshje të afërt me Iranin e ka zënë në befasi Netanyahun; ky lajm erdhi në një moment kur kryeministri po zhvillonte një takim me zyrtarë të lartë të sigurisë për dosjen iraniane.
Burimet izraelite që citon CNN theksojnë se Tel Avivi mbetet skeptik ndaj negociatave dhe dyshon për sinqeritetin e Teheranit. Ato vënë në dukje gjithashtu se edhe nëse Shtetet e Bashkuara dhe Irani nënshkruajnë një memorandum mirëkuptimi, kjo nuk garantojnë automatikisht arritjen e një marrëveshjeje përfundimtare midis palëve.
