Kalldrëmet e Gjirokastrës u mbushën me tinguj tradicionalë në mbrëmjen hapëse të aktivitetit kulturor “Iso mbi Kalldrëm”. Qindra qytetarë dhe turistë ndoqën koncertin e parë të këtij eventi, që do të zhvillohet gjatë gjithë muajit gusht, duke krijuar një atmosferë festive në zemër të qytetit muze.
Grupi “Nektar” hapi mbrëmjet artistike me interpretimin e këngëve të traditës, duke sjellë emocione dhe duke promovuar vlerat e trashëgimisë shpirtërore shqiptare. Koncerti i parë shërbeu si nisje për programin e gjatë të festivalit, që synon të kthejë Pazarin Karakteristik në një skenë të hapur ku muzika tradicionale bashkëjeton me atmosferën historike të qytetit.
Vizitorët shprehën entuziazëm për evenimentin dhe energjinë që përcjell. Një turiste deklaroi: “Është e mrekullueshme. Muzika, atmosfera dhe njerëzit janë fantastikë. Më pëlqen shumë energjia që përcjell ky festival. Do të dëgjojmë edhe këngë polifonike dhe muzikë tradicionale, të cilat janë shumë të bukura dhe plot jetë”. Një tjetër turist theksoi lidhjet kulturore mes vendeve, duke krahasuar traditat lokale me ato të tij: “Gjirokastra është një qytet shumë i bukur dhe me histori të pasur. Njerëzit këtu janë shumë mikpritës dhe kjo më kujton traditat e vendit tim, Kurdistanit. Edhe ne kemi muzikë dhe këngë tradicionale që ngjajnë me ato shqiptare. Atmosfera është e mrekullueshme. I ftoj të gjithë të vizitojnë Shqipërinë, sepse njerëzit janë shumë të dashur.”
Gjatë gjithë muajit, “Iso mbi Kalldrëm” do të sjellë në Pazarin Karakteristik grupe polifonike dhe artistë nga treva të ndryshme, duke e kthyer Gjirokastrën në një qendër të aktiviteteve kulturore dhe turistike. Programi parashikon performanca të ndryshme që synojnë të nxjerrin në pah traditat muzikore dhe të ofrojnë përvojë të drejtpërdrejtë për banorët dhe vizitorët, ndërthurur me peizazhin dhe hapësirat historike të qytetit.
