Telefonata e fundit e Lorena Itzerit, 46 vjeçe, është bërë një prej provave kryesore në hetimin e ngjarjes në Firence, ku ajo u vra nga ish-partneri i saj, 36-vjeçari Federico Vela. Ajo telefonoi në numrin e emergjencës 112 pak pas orës 14:00, ndërsa ndodhej e mbyllur në bagazhin e makinës së ish-partnerit. Thirrja zgjati rreth 20 minuta dhe regjistroi momentet dramatike para tragjedisë.
Gjatë bisedës me policinë, Lorena deklaroi se ish-i dashuri e kishte sulmuar në një garazh, e kishte futur në automjet dhe e kishte lidhur. Ajo u përpoq të jepte sa më shumë informacion për autorin, duke përmendur emrin e tij – Federico, moshën 36 vjeç – dhe duke treguar se kishte qenë në makinë rreth dhjetë minuta. Megjithë situatën, 46-vjeçarja mbeti e qetë dhe tha se nuk dinte drejtimin por dyshonte se po shkonte drejt banesës së tij në lagjen Galluzzo të Firences.
Telefonata kishte probleme për shkak të lëvizjes së automjetit në autostradën A1. Rreth tetë minuta pas nisjes së thirrjes, policia kuptoi se situata ishte kritike. Telefoni i Lorenës regjistroi tingujt brenda makinës; në një moment automjeti ndaloi dhe u dëgjua hapja e bagazhit, ndërsa efektivët qëndruan të heshtur për të mos treguar prani. Pas kësaj dëgjohen fjalët e Lorenës që i drejtohen ish-partnerit: “Çfarë po bën? Të dua, mos u shqetëso, do të takohemi përsëri.” Autoritetet vlerësojnë se ato mund të kenë qenë përpjekje për ta qetësuar Velën dhe për ta bindur që të mos e vriste.
Hetimet tregojnë se 36-vjeçari nuk pranoi ndarjen dhe në javët e fundit i kishte bërë presion përmes mesazheve. Pak minuta pas telefonatës, Vela ndaloi pranë një ure mbi autostradën A1 në Barberino del Mugello dhe hodhi Lorenën nga ura. Rreth 40 minuta më vonë, pas negociatave me policinë, 36-vjeçari i dha fund jetës duke u hedhur nga i njëjti vend.
Telefonata e fundit e Lorenës konsiderohet një element thelbësor i dosjes hetimore, pasi dokumenton minutat dramatike para përfundimit tragjik të ngjarjes.
