Ish-ministri Pirro Vengu, i ftuar në emisionin ‘Top Story’ nga Grida Duma, foli për mënyrën e prokurimeve dhe për partneritetet private në industrinë ushtarake. Ai theksoi se në këtë sektor tenderët shpesh merren edhe pa garë dhe se jo gjithmonë është e domosdoshme që të ketë konkurs publik, pasi kjo industri nuk funksionon gjithmonë me të njëjtat rregulla si sektorët e tjerë. Sipas Vengut, prokurimet ushtarake mund të mos bëhen përmes tenderëve publikë, por kjo nuk do të thotë se mungon ndonjë procedurë.
Vengu sqaron se partneritetet midis shtetit dhe kompanive private janë standard në industrinë ushtarake dhe shërbejnë jo vetëm për blerje, por edhe për transferim teknologjie. Ai përmendi kompaninë KAYO si shembull, duke theksuar se “Kayo nuk është themeluar sot as dje, por në vitin 2024”, se është në pronësi të shtetit shqiptar dhe realizon partneritete me partnerë privatë të specializuar. Sipas tij, KAYO furnizon forcën e armatosur dhe përbëhet nga pesë kompani që marrin porosi për mjete të ndryshme ushtarake.
Ish-ministri bëri të ditur se çdo shtet i NATO-s ka kompani të ngjashme ku vetë shteti është aksioner, duke reflektuar një praktikë të përhapur në këtë fushë. Ai shpjegoi logjikën e partneriteteve, sipas së cilës shteti nuk përfshihet në investim të drejtpërdrejtë, por mbetet porositësi, ndërsa operatorët privatë kontribuojnë me kapital dhe ekspertizë. Për arsye sigurie, Vengu shtoi se nuk është e nevojshme që të bëhen publike të gjitha blerjet që kryen shteti në fushën ushtarake.
Duke rikujtuar periudhën kur ai ishte ministër, Vengu tha se kur vendosën të rrisin buxhetin ushtarak iu afruan dhjetëra kompani që ofronin armatime; zgjidhja e adoptuar ishte ajo e partneriteteve me privatët, që sipas tij është modeli që funksionon aktualisht.
