Ish-lojtarët e akademisë së Real Madridit, Ferrán Ruiz, Juan Rodríguez dhe Andrés García, kanë pranuar dënim prej një viti burg për veprën penale të pornografisë me të mitur, lidhur me një video seksuale të regjistruar në vitin 2023 në Gran Canaria. Mbrojtësi i ekipit të parë, Raúl Asencio, është shpallur i pafajshëm. Vendimi u arrit përmes një marrëveshjeje mes të gjitha palëve pasi dy vajzat që shfaqen në video — njëra prej të cilave ishte 16 vjeçe në kohën e ngjarjes — deklaruan gjatë gjyqit se i kanë falur të katër futbollistët.
Falja e viktimave bëri që ndaj Asencios të rrëzohej akuza e vetme me të cilën përballej, ajo e zbulimit të sekreteve; ai akuzohej se i kishte treguar një personi të tretë videon që i ishte dërguar nga tre të pandehurit e tjerë, duke e ditur se ishte regjistruar pa lejen e dy vajzave. Për tre ish-lojtarët e akademisë, falja shërbeu si rrethanë lehtësuese dhe Prokuroria pranoi uljen e ndjeshme të dënimit për veprën e pornografisë me të mitur. Fillimisht Prokuroria kërkonte 4 vite e 7 muaj burg për Ruiz, Rodríguez dhe García, ndërsa për Asencion kishte kërkuar 2 vite e 6 muaj.
Gjatë seancës, dy vajzat deklaruan se falja ishte bërë “me vullnetin e tyre” dhe “që kjo çështje të përfundojë”. Asencio i kërkoi falje viktimave dhe i falënderoi për qëndrimin e tyre, ndërsa të njëjtën gjë bëjnë edhe dy nga të pandehurit e tjerë.
Me kërkesë të mbrojtjes, Prokuroria pranoi pezullimin e dënimit prej një viti për Ruiz, Rodríguez dhe García, me kusht që ata të mos kryejnë vepra të tjera penale gjatë dy viteve të ardhshme dhe të ndjekin një kurs ndërgjegjësimi mbi çështjet seksuale. Gjykatësja Virginia Peña mori parasysh rrethanat personale dhe sociale të të dënuarve, mungesën e precedentëve penalë dhe përpjekjet për të riparuar dëmin. Sipas gjykatëses dhe prokurores, pezullimi lejohet nga Kodi Penal spanjoll për dënimet me burgim më pak se dy vjet.
Raúl Asencio u lirua gjithashtu nga detyrimi për të paguar shpenzimet gjyqësore; tre ish-lojtarët e akademisë duhet t’i paguajnë ato. Gjykata vendosi gjithashtu një urdhër ndalimi kontakti për dy vjet ndaj viktimës së moshës 16 vjeç në kohën e ngjarjes, si dhe ndalim për tre vjet për ushtrimin e çdo profesioni ose aktiviteti që përfshin kontakt me të mitur.
