Komisioni për mbrojtjen e gjyqtarëve, në të cilin bëjnë pjesë përfaqësues të Ministrisë së Brendshme, Ministrisë së Drejtësisë, anëtarë të Këshillit të Lartë të Gjyqtarëve, drejtuesi i Gjykatës së Posaçme Erjon Bani dhe zyrtarë të Policisë së Shtetit, ka miratuar masa shtesë mbrojtjeje për gjyqtaren Irena Gjoka. Përveç gardës me detyrë për të ruajtur gjyqtarët dhe prokurorët e SPAK, për të do të angazhohen edhe oficerë nga njësia e mbrojtjes së veçantë.
Të dhënat për kërcënimet ndaj gjyqtares antikorrupsion dhe indiciet për rrezikimin e saj mbahen sekret nga autoritetet, ndonëse Top Channel ka kërkuar shpjegime nga anëtarët që janë të ngarkuar nga ligji për ruajtjen e gjyqtarëve dhe prokurorëve. Gjoka ka pasur më parë mbrojtje, jo vetëm për shkak të detyrës si zv/kryetare e Gjykatës së Posaçme, por edhe si relatore e çështjeve të njohura publikisht, përfshirë dosjen “Partizani”. Në kulmin e akuzave ndaj saj gjatë kësaj çështjeje, autoritetet vlerësuan se ajo ishte e rrezikuar dhe i vendosën truproja.
Aktualisht, komisioni ka vendosur mbrojtje të veçantë edhe për gjyqtarin Gentian Muça, pasi në automjetin që përdorte ai dhe bashkëshortja e tij prokurore u vendos tritol rreth pesë vjet më parë. Po ashtu, ish-gjyqtari i Shkodrës Tonin Stërkaj është objekt i masave të vlerësuara si të nevojshme pas një sulmi me tritol në banesën e tij, ndërsa autorët nuk janë gjetur; ai ka larguar familjen dhe, pavarësisht se është shkarkuar nga vettingu, komisioni i KLGJ ka vlerësuar se mbetet i rrezikuar.
Masa mbrojtëse e shtetit përqendrohet kryesisht te prokurorët e SPAK. Nga të mbrojturit nga shteti përmenden edhe tre prokurorë të Elbasanit, njëri prej të cilëve për arsye sigurie është transferuar në kryeqytet.
