Qeveria e Irakut njoftoi se forcat amerikane kanë përfunduar tërheqjen e plotë nga objektet ushtarake brenda territorit të saj federal, përveç Rajonit të Kurdistanit, ku trupat amerikanë vazhdojnë të qëndrojnë. Sipas Ministrisë irakiane të Mbrojtjes, kontingjenti i fundit i këshilltarëve amerikanë u largua nga Baza Ajrore Al-Asad, që ka strehuar trupa amerikane për më shumë se dy dekada.
Tërheqja, që filloi pas një kërkese zyrtare nga qeveria irakiane në vitin 2023, përfshin edhe largimin e koalicionit të udhëhequr nga SHBA-të nga Komanda e Operacioneve të Përbashkëta, duke ia transferuar kontrollin forcave irakiane të sigurisë. Megjithatë, forcat amerikane mbeten të pranishme në Bazën Ajrore Harir, në provincën Erbil të Rajonit Autonom të Kurdistanit, që nuk kontrollohet plotësisht nga Bagdadi.
Prania ushtarake amerikane në Irak ka kaluar nëpër për ndryshime të shumta që nga pushtimi i vitit 2003, duke arritur kulmin me rreth 170 mijë trupa. Pas tërheqjes së vitit 2011, trupat u rikthyen në vitin 2014 për të luftuar ISIS-in. Deri në dhjetor 2021, rreth 2,500 trupa amerikane kishin një rol këshillimor.
Ministria e Mbrojtjes irakiane publikoi një video që tregon bazën Al-Asad bosh, ndërsa Komanda Qendrore e SHBA-se konfirmoi dorëzimin e instalimeve, duke mos dhënë detaje të mëtejshme. Tërheqja ndodh në një kohë tensionesh të larta mes SHBA-së dhe Iranit. Baza Al-Asad ka qenë cak i shumë sulmeve nga grupe pro-iraniane, përfshirë një sulm me raketa në janar 2020 pas vrasjes së gjeneralit Qasem Soleimani.
Pas sulmeve të 7 tetorit 2023 në Izrael, intensifikohen sulmet ndaj bazës. Autoritetet irakiane theksuan se forcat e armatosura të vendit kanë kapacitet të mjaftueshëm për të garantuar sigurinë kombëtare, duke planifikuar bashkëpunim të ardhshëm me SHBA-në në trajnim dhe ushtrime të përbashkëta.
Ndërsa Irak beson se misioni i koalicionit ka përfunduar, operacionet kundër ISIS-it do të vazhdojnë në Siri. Bagdadi nuk e përjashton mundësinë e operacioneve të përbashkëta SHBA-Irak nga Baza Al-Asad, nëse nevojiten. Tërheqja e SHBA-së pritet gjithashtu të ketë ndikim në negociatat për çarmatimin e milicive jo-shtetërore në Irak.
