Familja e 28-vjeçarit Erkan Nika i bën apel shtetit shqiptar për t’u përfshirë në kërkimet për gjetjen e tij, pas sulmit me dronë ndaj një anijeje turke ku ai punonte si inxhinier i dytë. Babai, Rexh Nika, në një intervistë për gazetaren e Top Channel, Anila Hoxha, kërkon gjithashtu ndihmë nga autoritetet turke dhe institucionet përkatëse në vendet përreth Detit të Zi.
Në deklaratën e publikuar, babai thotë: “U bëjmë thirrje të gjitha spitaleve, të gjitha institucioneve shëndetësore, policisë, autoriteteve dhe institucioneve përkatëse në Rusi, Gjeorgji dhe përreth Detit të Zi që të kontrollojnë regjistrat e tyre për pacientë të paidentifikuar, personave të plagosur, ose individë të gjetur në zonat bregdetare të Detit të Zi. Kërkojmë ndihmë nga institucionet shtetërore të Shqipërisë”. Ai apelon që të verifikohen regjistrat për persona të paidentifikuar ose të plagosur që mund të kenë lidhje me ngjarjen.
Familja Nika jeton në Turqi që prej vitit 1997, dhe burimet familjare thonë se Erkani punonte prej vitesh në anijen e mallrave Aroyat. Sipas babait, anija ishte nisur nga porti i Durrësit dhe në bord ndodheshin 16 anëtarë ekuipazhi. Pas sulmit me dronë, i kryer më 27 shtator pranë portit Novorossiysk në Detin e Zi, u shpëtuan 15 anëtarë të ekuipazhit, ndërsa Erkan Nika rezulton i zhdukur dhe nuk figuron në listën e të shpëtuarve.
Rexh Nika tregon se mesazhin e fundit me djalin e mori më 23 shtator: “Me djalin, mesazhin e fundit e kam ditën e mërkurë më 23 shtator. Në darkë para se të flija, i kam bërë mesazh, një lutje. Ma ktheu përgjigjen të nesërmen në orën 08:39. ‘Jemi në Detin e Zi’, më ka thënë”. Familja kërkon që autoritetet të bashkëpunojnë për të sqaruar fatin e Erkanit dhe për të kontrolluar çdo gjurmë që mund të ndihmojë në lokacionin apo identifikimin e tij.
