Interi po i afron një transferimi të mundshëm të portierit Ivan Provedel nga Lazio, ndërsa vazhdon lëvizjet për të forcuar repartin e portës. Sipas raportimeve të gazetares Alfredo Pedullà, agjenti i Provedel, Gianni Rava, zhvilloi një takim me drejtuesit zikaltër në selinë e klubit në Viale della Liberazione, ku palët arritën një marrëveshje paraprake për kushtet personale të lojtarit.
Provedel pritet të nënshkruajë një kontratë trevjeçare me Interin, me një pagë mbi 1.5 milionë euro në sezon dhe bonuse të lidhura me performancën. Portieri, i kontraktuar me Lazion deri në qershor të 2027-ës, ka dhënë miratimin e tij të plotë për transferimin në Milano dhe është i gatshëm të pranojë konkurrencën me Josep Martínez për një vend në formacionin e trajnerit Simone Inzaghi.
Megjithatë, pavarësisht marrëveshjes me lojtarin, operacioni nuk është përmbyllur ende, pasi Interi duhet të bindë Lazion. Presidenti i klubit kryeqytetas, Claudio Lotito, konsiderohet pengesa kryesore në negociata. Aktualisht ekziston një diferencë mes ofertës së Interit dhe kërkesës së Lazios: zikaltërit ofrojnë rreth 2–3 milionë euro, duke u bazuar pjesërisht në faktin që kontrata e Provedel po i afrohet fundit, ndërsa Lazio kërkon të paktën 4–5 milionë euro për të lejuar largimin e portierit.
Bisedimet mes dy klubeve priten të vazhdojnë në ditët në vijim, me Interin që synon të arrijë një marrëveshje përfundimtare dhe të sigurojë shërbimet e Provedel për sezonin e ri. Në këtë fazë, çështja kryesore mbetet gjetja e një formule të pranueshme për vlerën e kartonit që t’i përshtatet kërkesave të Lazios dhe mundësive financiare të Interit. (Top Channel)
