Nga gomonet, shqiptarët kaluan tek format botërore të trafikut. Inside Story zbërtheu me detaje një prej grupeve të fuqishme që operonte me baza nga Shqipëria, në Kosovë, Spanjë, Portugali e më gjerë, vende tranzit që çonin emigrantë drejt SHBA-së, Kanadasë, Britanisë e më tej.
Nga provat materiale rezulton se grupi nuk kishte vetëm synim emigrimin ilegal, por edhe përvetësimin e pronave përmes dokumenteve të falsifikuara. Sekuestrimi i një laboratori falsifikimi në banesën e Ulli dhe Pjerin Brahimaj, babë e bir, nxori në dritë elemente që konfirmojnë këtë dyshim. Brenda laboratorit u gjetën pajisje të ndryshme për prodhimin e dokumenteve, kompjutera dhe laptopë me të dhëna të shtetasve shqiptarë dhe të kombësive të ndryshme, kryesisht amerikane, greke, franceze dhe italiane. Po ashtu u gjetën certifikata pronësie të falsifikuara dhe akte noteriale të ndryshme të falsifikuara.
Nuk dihet nëse nga ky grup është krijuar një fraksion i dedikuar vetëm për verifikimin e dokumenteve të falsifikuara për pronat, por zbulimi i laboratorit përbën një provë të fortë që mund të çojë në tjetërsime të trojeve. Rasti evidenton fenomenin e vazhdueshëm të privimit të pronarëve nga e drejta mbi pasuritë e tyre, përmes transferimesh të përtalla dokumentesh. Mjaftonë kontakti me këtë grup që ata të prodhonin dokumente të ndryshme, dokumente që më pas përdoren në procese gjyqësore dhe deri te regjistrimi i pasurive. Dëmi konkret i shkaktuar ndaj pronave mbetet i paqartë, por rasti përforcon ekzistencën e këtij fenomeni gjatë dekadave të fundit.
Në rrjetin e falsifikatorëve identifikohet si mjaft aktiv edhe shtetasi Gridi Elezi, i cili shfaqet në komunikime dhe survejime të shumta duke folur për porositë që merr. Pika e tij e kontaktit për kryerjen e punëve është Njazi Ademaj, i njohur me nofkën ‘El Çapo’.
