Vullkani Lewottobi Laki-Laki, në Ishullin Flores të Indonezisë lindore, ka hyrë në një fazë të re vullkanike me shpërthime të përsëritura që nga mbrëmja e kaluar. Si rezultat, niveli i alarmit është ngritur në shkallën më të lartë, ndërsa hiri vullkanik është hedhur deri në 10 kilometra lartësi.
Shpërthimi më i fuqishëm ndodhi në orën 01:35 të mëngjesit (ora lokale), duke dërguar hi dhe gazra në ajër. Sipas Institutit Indonezian të Vullkanologjisë, një shpërthim tjetër që kishte ndodhur më herët dërgoi hirin deri në 9 kilometra lart. Agjencia e Vullkanologjisë ka ngritur nivelin e alarmit në katër, që përfaqëson nivelin më të lartë të mundshëm, dhe i ka rekomanduar banorët dhe turistët të qëndrojnë të paktën 6 kilometra larg kraterit për të shmangur rreziqet potenciale.
Drejtori i agjencisë, Muhammad Wafid, ka paralajmëruar gjithashtu për rrezikun e përmbytjeve nga rrjedhat e baltës në rast reshjesh, duke përmendur se hiri mund të shkaktojë probleme për operacionet në aeroportet e zonës. Aktivitete të fluturimeve janë pezulluar tashmë në aeroportin Momere, që ndodhet 60 kilometra larg vullkanit dhe shërben kryesisht për fluturime të brendshme.
Kujtojmë se vullkani kishte hyrë në një fazë shpërthyese edhe në korrik, kur një kolonë hiri arriti deri në 18 kilometra, çka çoi në anulimin e rreth njëzet fluturimeve për në ishullin e Balit. Vullkani Laki-Laki, emri i të cilit do të thotë “burrë” në gjuhën vendase, është i lidhur me një tjetër vullkan, Parabuan, ku aktiviteti është më pak intensiv.
Indonezia, që ndodhet mbi “unazën e zjarrit” në Oqeanin Paqësor, përballet me aktivitet të shpeshtë dhe intensiv vullkanik dhe sizmik për shkak të lëvizjes së pllakatit tektonik. Situata aktuale kërkon vëmendje të veçantë dhe masa të menjëhershme për të siguruar mbrojtjen e banorëve dhe turistëve në zonën e prekur.
