Ngërçi i krijuar mes avokatëve dhe Gjykatës së Posaçme Kundër Korrupsionit dhe Krimit të Organizuar (GJKKO), Shkalla e Parë, u debatua në seancën e Komisionit për Nismat Qytetare, Bashkëpunimin dhe Mbikëqyrjen Institucionale, ku mori pjesë edhe Inspektori i Lartë i Drejtësisë, Artur Metani. Kryetari i Komisionit, Xhafaj, shfaqi shqetësimin për pasojat e konfliktit të hapur publik mes palëve dhe pyeti nëse ILD mund të ndërhyjë brenda kompetencave ligjore për të gjetur një zgjidhje që të shmangë dëm të mëtejshëm për sistemin dhe qytetarët.
Metani deklaroi se ILD ndjek me vëmendje situatën dhe mban diskutime të përditshme rreth ngjarjeve, por theksoi se kompetencat e Inspektorit janë të kufizuara. Sipas tij, çështja mund të shndërrohej në shkelje me karakter disiplinor, ndërsa ndërhyrjet për zgjidhje të natyrës negociuese apo tryeze mes palëve sipas Metanit shkojnë përtej kompetencave të ILD dhe lidhjen më shumë me karakteret njerëzore sesa me çështje strikte ligjore. Ai shtoi se si institucion ILD do të ndihmonte sa të ishte e mundur, por vendimmarrja nuk varet vetëm nga dëshira e Inspektorit.
Xhafaj shprehu mendim disi të ndryshëm, duke argumentuar se ekziston baza për ndërhyrje të Inspektorit për shkak se cenohet procesi i rregullt ligjor dhe zgjatja e proceseve gjyqësore. Ai theksoi se zgjidhja i takon palëve institucionale, por një ndërhyrje do të ishte e arsyeshme për ruajtjen e balancave dhe kontrollit reciprok, duke përmendur tri çështje kyçe: çështjet penale, procesin e rregullt ligjor dhe prapambetjet që tejkalojnë normën.
Metani propozoi një marrëdhënie partneriteti mes Komisionit dhe ILD, ku Komisioni ndan shqetësimet dhe ushtron rolin e mbikëqyrjes, ndërsa mund të kërkojë inspektime tematike që ILD do t’i kryejë sipas mundësive. Ai konkludoi se ILD është i gatshëm të ndihmojë Komisionin dhe të bashkëpunojë për të dalë me një vlerësim të pjekur mbi problemet e sistemit të drejtësisë dhe mënyrat e tyre të zgjidhjes.
