Ka ndërruar jetë në spitalin e Traumës 52-vjeçari nga Kuçova Lefter (Krenar) Brisku, pasi u dhunua barbarisht nga 20 vjeçari Bjorsi Shushari, i cili e kapi në banesën e tij në tentativë për të grabitur pulat.
I vëllai i tij, Shyqo Brisku në një prononcim për mediat akuzon Policinë se nuk i kanë njoftuar në lidhje me ngjarjen, por e kanë marrë vesh nga televizori.
“Në orën 9 ka ikur nga shtëpia, ka qenë i dehur. Kur e morëm vesh të nesërmen, edhe policia ka një gabim se nuk na e tregoi gjendjen. Nga këtu e çuan në Berat, nga Berati te Trauma. Ne e morëm vesh të nesërmen përmes televizorit.Policinë e bëj me faj se duhet të na njoftonte.Sot e morëm vesh që na vdiq vëllai, na iku një dritë syri. Ai kishte një çun dhe gruan. Mirë ishte, punonte në një firmë”.
Ai kërkon drejtësi për humbjen e jetës së vëllait të tij.
“Nuk vrau një zog me llastiqe por vrau një rob. Një prind të një fëmije, na preku dhe ne si vëllezër. Nuk ka reaguar fare sa ka qëndruar në spital”.
Edhe komshinjtë thonë se nuk e njihnin për person problematik.
“Djalë i shëlqyer, e kam pasur komshi dhe nuk kam pasur debate. Ngjarjen e mora vesh përmes televizorit. Të tërë pinë raki por nuk ishte në atë gjendje…”
Ngjarja ka ndodhur mesnatën e 26 shkurtit kur Lefer Brisku tentoi të hynte në ambientet e pronës së familjes Shushari për të vjedhur dy pula. Në atë moment është kapur nga 20-vjeçari Bjorsi Shushari i cili e ka dhunuar brutalisht duke i shkaktuar fraktura të shumta në kokë të cilat më pas i shkaktuan edhe vdekjen.
