Hetimi ndaj Gianluca Rocchi sjell detaje të reja, ku dy nga tri akuzat lidhen me përzgjedhjen e arbitrave për ndeshjet e Interit në sezonin 2024/2025. Sipas hetuesve, klubi zikaltër dyshohet t’i ketë ndarë arbitrat në “të mirëpritur” dhe “të padëshiruar”, me referencë të veçantë ndaj ndeshjeve kundër Bolonjës dhe Milanit në Kupën e Italisë. Në këtë kornizë, Andrea Colombo konsiderohej arbitër i preferuar nga Interi, ndërsa Daniele Doveri si i padëshiruar.
Megjithatë, raportimet e Corriere dello Sport hedhin dyshim mbi këtë hipotezë duke u nisur nga të dhënat zyrtare dhe renditjet e sezonit të kaluar. Në klasifikimin e arbitrave për sezonin e mëparshëm, Doveri rezulton i pari, ndërsa Colombo është i katërti, pozicionime që i vendosin të dy midis arbitrave më të mirë në Serie A. Kjo, sipas gazetes, i bën të pritshme emërimet e tyre në takime kyçe, veçanërisht gjatë fazave vendimtare të sezonit.
Si pasojë, emërimet e Doverit dhe Colombos në sfidat ndaj Interit mund të shpjegohen nga renditjet dhe meritokracia sportive: Doveri ishte gjyqtar në ndeshjen Inter-Milan (0-3), e vlefshme për kthimin e gjysmëfinales së Kupës së Italisë më 23 prill, ndërsa Colombo arbitroi Bologna-Inter (1-0) më 20 prill. Po ashtu, Doveri kishte drejtuar edhe përballjen Parma-Inter (2-2) më 5 prill.
Gazeta thekson gjithashtu se pas datës 2 prill — periudhë që prokuroria e lidhi me ndërhyrje të mundshme në përcaktimet e arbitrave — Colombo ka ndrequr vetëm një ndeshje të Interit, atë ndaj Bolonjës. Këto të dhëna bëhen pjesë e diskutimit rreth akuzave në hetim, ndërsa renditjet dhe emërimet zyrtare vihen në përballje me dyshimet për manipulim në përzgjedhjen e arbitrave.
