Drejtoria e Përgjithshme e Burgjeve njofton se, bazuar në informacionet paraprake të marra në rrugë operative nga strukturat e Shërbimit të Kontrollit të Brendshëm në Sistemin e Burgjeve (ShKBB), me urdhër të Drejtorit të Përgjithshëm, Adriatik Kupi, për arsye sigurie është kryer transferimi i një të dënuari me burgim të përjetshëm, me iniciale M.P., nga IEVP Peqin në IEVP Burrel.
Gjatë pranimit në IEVP Burrel është kryer një kontroll i imtësishëm i materialeve personale të të dënuarit. Në kuadër të këtij kontrolli është konstatuar një qese e vogël, e dyshuar si lëndë narkotike, e fshehur brenda një çorape midis sendeve personale të tij. Pas zbulimit, janë njoftuar menjëherë drejtuesit e institucionit dhe Shërbimi i Kontrollit të Brendshëm në Sistemin e Burgjeve.
Komisariati i Policisë Burrel është informuar dhe ka marrë në dorëzim materialin e gjetur për kryerjen e ekspertizës përkatëse. Sipas njoftimit të Drejtorisë, ngjarja po ndiqet dhe trajtohet sipas procedurave ligjore në fuqi, ndërsa veprimet hetimore dhe procesore do të zhvillohen nga organet kompetente për të përcaktuar natyrën e materialit të sekuestruar dhe përgjegjësitë ligjore që rrjedhin prej tij.
