Kryetari i CDU-së dhe kancelari federal, Friedrich Merz, njoftoi se do të ketë pasoja pas fitores së thellë të partisë së ekstremit të djathtë Alternativa për Gjermaninë (AfD) në Saksoni-Anhalt dhe humbjes së rëndë të CDU-së. Pas një mbledhjeje urgjente me drejtuesit e partisë në Berlin, Merz u shpreh i tronditur nga rezultati dhe theksoi se ai duhet pranuar si rregull i demokracisë, por se nuk prek vetëm Saksoni-Anhaltin, por të gjithë Gjermaninë. “Kjo është humbja më e rëndë zgjedhore që CDU-ja ka pësuar prej vitesh, madje prej dekadash. Kjo natyrisht do të duhet të ketë pasoja,” tha ai.
Merz paralajmëroi se CDU-ja nuk mund të vazhdojë me rutinën e përditshme, duke theksuar se rezultati ka shkaktuar tronditje të mëdha në vend dhe brenda vetë partisë. Ai deklaroi se do të përpiqet t’i përgjigjet seriozisht situatës dhe pranoi se rezultati e prek edhe personalisht. Institucionet shtetërore dhe Kushtetuta, sipas tij, janë të forta dhe të qëndrueshme; qeveria federale do të sigurojë zbatimin e Kushtetutës, dhe ky mesazh është edhe për partnerët jashtë vendit. Merz përmendi përgjegjësinë e veçantë të Gjermanisë për shkak të historisë dhe rikonfirmoi lidhjen e fortë të vendit me Evropën.
Ai nuk po shqyrton pasoja personale për veten pas humbjes. “Dorëzimi nuk është një opsion për mua. Të gjithë së bashku duhet të bëhemi më të mirë. Dhe po kërkoj mënyra se si mund ta arrijmë këtë,” tha Merz, duke premtuar se në javët dhe muajt e ardhshëm do të përpiqet të ndryshojë dhe përmirësojë politikën, ndërsa bindjet e tij themelore mbeten të pandryshuara.
Në zgjedhjet e landit, AfD-ja arriti një fitore të madhe, megjithëse jo me shumicë absolute, ndërsa CDU-ja u rendit e dyta duke pësuar humbje të konsiderueshme. Rezultati erdhi pas pritshmërive të Merz-it se do ta “përgjysmonte” AfD-në, ndërkohë që zgjedhjet në praktikë përgjysmuan pozicionin e CDU-së, duke rritur presionin ndaj tij dhe partisë.
