Organizatat që kërkojnë persona të zhdukur njoftuan se më shumë se 1,000 pjesë kockash u zbuluan në brigjet e Liqenit Chalco, një zonë ku autoritetet kishin kryer kërkime për më shumë se një javë. Për dhjetë ditë, ekipet u fokusuan në kërkime në pjesën lindore të kryeqytetit, por familjet e të zhdukurve thanë se hetimet u shndërruan në “një krizë mjeko-ligjore me përmasa të papritura”, duke akuzuar autoritetet se nuk kishin bërë punën siç duhet.
Sipas rrëfimit të një anëtari të grupit që mori pjesë në hetime, aktivistët gjetën fragmente kockash në zona që më parë ishin ekzaminuar nga zyra e prokurorit lokal. Me dhimbje dhe zemërim, ata njoftuan se kishin gjetur “të paktën 1,076 pjesë kockash”, dhe vënë në dukje se kompleksiteti i gërmimit në terren të vështirë “nuk duhet të jetë justifikim për vonimin e procesit”. Familjarët kërkuan që kërkimi të vazhdojë pa ndërprerje derisa të gërmohet i gjithë vendi.
Autoritetet, përmes një raporti të datës 13 prill nga zyra e prokurorit, njoftuan zbulimin e 317 fragmenteve kockash, që sipas analizave paraprake mund t’u përkasin të paktën tre personave. Kjo diferencë midis numrit të raportuar nga aktivistët dhe atij zyrtar ka nxitur përplasje rreth mënyrës së kryerjes së hetimeve dhe besueshmërisë së inspektimeve paraprake në terren.
Rasti vjen në kuadrin e një krize më të gjerë të zhdukjeve masive në Meksikë, që nisi në vitin 2006, kur autoritetet nisën një operacion ushtarak kundër karteleve të drogës. Së atëherë, kanë qenë të raportuara më shumë se 130,000 zhdukje, ndërsa përshkallëzimi i dhunës nga krimi i organizuar dhe arbitrariteti i forcave të sigurisë janë përmendur si faktorë përkeqësues.
Në fillim të prillit, Komisioni i Kombeve të Bashkuara për Zhdukjet me Forcë (CED) denoncoi bashkëpunimin e zyrtarëve shtetërorë në zhdukjet e njerëzve, duke e cilësuar si një “krim kundër njerëzimit”. Presidentja Claudia Sheinbaum reagoi duke akuzuar ekspertët e Komisionit se po injorojnë përparimin që qeveria ka bërë në këtë çështje.
