Aktori amerikan Vincent Pastore, i njohur për rolin e Salvatore “Big Pussy” Bonpensiero në serialin “The Sopranos”, ka ndërruar jetë në moshën 80-vjeçare. Sipas BBC, Pastore u gjet i pajetë në banesën e tij në lagjen Bronx të Nju Jorkut; autoritetet nuk kanë gjetur asnjë shenjë që lë të dyshohet për një vepër penale.
Pastore fitoi famë botërore me interpretimin e mikut të ngushtë të Tony Soprano-s, një personazh që më vonë bashkëpunon me FBI-në. Vdekja e personazhit të tij në sezonin e dytë konsiderohet si një nga momentet më të paharrueshme të serialit, megjithëqë aktori vazhdoi të shfaqej në të gjitha gjashtë sezonet përmes skenave rikujtuese.
Menaxheri i tij, Robert Attermann, e përshkroi Pastore si një aktor të përkushtuar dhe një njeri me zemër të madhe. “Në sytë e publikut ai do të mbetet gjithmonë ‘Big Pussy’, por për ata që e njihnin ishte shumë më tepër. Ai e donte aktrimin, respektonte kolegët dhe gjithmonë mbështeste aktorët e rinj, duke u dhënë këshilla dhe ndihmë”, tha Attermann. Ai shtoi se humbja e Pastore është personale për të, pasi për më shumë se tre dekada pati mundësinë të ndiqte nga afër jo vetëm karrierën e tij të suksesshme, por edhe të njihte njeriun e jashtëzakonshëm që ishte.
I lindur në Bronx në vitin 1946, Pastore shërbeu në Marinën Amerikane gjatë Luftës së Vietnamit përpara se t’i përkushtohej aktrimit. Karrierën e nisi me role në filma si “Goodfellas” dhe “Carlito’s Way”, dhe më vonë u shfaq në seriale të tjera të njohura si “Law & Order”, “General Hospital” dhe “Hawaii Five-O”. Roli në “The Sopranos” e bëri një nga aktorët më të njohur të televizionit amerikan. Në vitin 2000, ai dhe pjesa tjetër e kastit të serialit fituan çmimin Screen Actors Guild Award, duke vlerësuar suksesin e punës së tyre në serial.
