Aktori amerikan Eric Dane, i njohur për rolet e tij në “Grey’s Anatomy” dhe “Euphoria”, ka ndërruar jetë në moshën 53-vjeçare. Lajmi është bërë i ditur nga publicisti i tij. Dane u nda nga jeta pas një beteje të guximshme me sëmundjen e Sklerozës Laterale Amiotrofike (ALS), një sëmundje që prek qelizat nervore përgjegjëse për lëvizjen e muskujve, e njohur gjithashtu si sëmundja e Lou Gehrig.
Familja e tij ka njoftuar se Dane kaloi ditët e fundit me mbështetje nga bashkëshortja e tij, Rebecca Gayheart, dhe dy vajzat, Billie dhe Georgia. Pas diagnostikimit në vitin 2025, ai angazhohet për rritjen e ndërgjegjësimit rreth kësaj sëmundjeje dhe mbështetje për kërkimet shkencore, që ende nuk ka një kurë.
Dane fitoi famë ndërkombëtare për rolin e Dr. Mark Sloan në “Grey’s Anatomy”, ku bëri për vete audiencën me nofkën “McSteamy”. Ai ishte pjesë e serialit nga sezoni i tretë deri në të nëntin, dhe u rikthye në sezonin e 17-të. Më vonë, ai luajti rolin e Cal Jacobs në “Euphoria”.
Karriera e tij, e cila filloi në vitet ’90, përfshin gjithashtu filma të famshëm si “X-Men: The Last Stand”, “Marley & Me” dhe “Burlesque”. Edhe pas diagnozës, Dane vazhdoi të punonte dhe angazhohej për të rritur fonde për kërkimin mbi sëmundjet neurodegjenerative.
Në intervistat e tij të fundit, ai shprehte dëshirën për të kaluar sa më shumë kohë me familjen, duke theksuar se do të vazhdonte të luftonte deri në fund. “Do të luftoj deri në frymën e fundit,” kishte thënë ai, duke ndarë shpresat për të parë vajzat e tij që rriteshin dhe realizonin ëndrrat e tyre.
Eric Dane do të mbahet mend për rolet e tij ikonike, por gjithashtu për forcën dhe qetësinë me të cilat u përball me sëmundjen e tij.
