Frenkie De Jong iu përgjigj ashpër kritikave që i bëheshin nga tifozët dhe media holandeze, të cilët e përshkruanin stilin e tij të lojës si shumë pasiv, pak agresiv dhe me pak vertikalizim. Mesfushori i Barcelonës foli pas fitores së Holandës me Suedinë 5-1, duke thënë se shumë persona “nuk kuptojnë asgjë nga futbolli, e shohin por nuk e kuptojnë”. Ai u shpreh se kjo është e vërteta sipas tij dhe se nuk është keq që njerëzit flasin, por dëgjon shpesh akuza se “nuk jap pasime në thellësi”, çka, sipas De Jong, nuk është e vërtetë.
De Jong sqaroi se njerëzit nuk i kushtojnë vëmendje lojës dhe se gjithçka varet nga ndeshja dhe momenti. Ai theksoi se mund të japësh pasime në thellësi, por ndonjëherë topi përfundon tek portieri, ndërsa ecuria e aksionit varet edhe nga mënyra si vrapojnë bashkëlojtarët. “Po, mendoj se disa persona e kanë të vështirë për ta kuptuar. Ndoshta duhet të ulem me ta ndonjëhere. Varet edhe nga momenti në vetvete, nëse dikush vrapon apo jo, si vrapon…”, tha De Jong, duke lidhur vendimet e tij me dinamikën e situatës në fushë.
Më tej, mesfushori saktësoi se sulmi i tij kishte lidhje me nënvlerësimin që sipas tij u bëhet futbollistëve holandezë nga media vendase. Ai kërkoi që në Holandë t’u kushtohet më shumë vëmendje cilësive të lojtarëve dhe t’i vlerësojnë më mirë. De Jong pranoi se kritikat janë të drejta kur një futbollist nuk po luan mirë, por paralajmëroi se ndonjëherë kritikat janë të ekzagjeruara dhe lojtarë të mirë përshkruhen si më të dobëtit. Ai vuri në dukje se “kemi shumë djem që luajnë në nivelet maksimale, që janë aty prej vitesh ose që janë në një nivel të lartë” dhe shtoi se çdo lojtar mund të ketë një ndeshje të dobët, për të cilën është e drejtë të kritikohet. De Jong përfundoi duke thënë se shumë njerëz shprehin mendimet e tyre edhe për t’u bërë të njohur.
